საქართველოს კათოლიკოს-პატრიარქი მახათას მთაზე დღეს, 17 აპრილს, საღამოს 6 საათზე გადაიხდის პარაკლისს, რის შემდეგაც ტაძრის საკურთხევლის ადგილზე პირველი ნიჩბით, პირველ მიწას ამოიღებს.
ტაძრის საძირკველში ჩაბრძანებული იქნება მსოფლიოს სხვადასხვა წმინდა ადგილებიდან და საქართველოს ეპარქიებიდან ჩამობრძანებული სიწმინდეები. ამ ისტორიულ ღონისძიებაში მონაწილეობის მისაღებად მრევლი საქართველოს 38-ვე ეპარქიიდან ჩამოვა.
პატრიარქის კურთხევით მოსახლეობა მოიტანს ქვებს, რომლებზეც ლოცვასთან ერთად მათი ოჯახის წევრების და მათთვის ძვირფასი ადამიანების სახელები იქნება დატანილი. ეს ქვები ტაძრის საძიკველში იქნება ჩაბრძანებული.
სპეციალურად ამ დღისთვის, პატრიარქის კურთხევით, დაიწერა ანგია წინასწარმეტყველის ხატი, რომელიც მშენებლობის მფარველად ითვლება.
მშენებლობის დაწყების ცერემონიალში მონაწილეობას მიიღებს ფონდ „ივერიისა"-ს დამფუძნებელი პაატა ბურჭულაძე, რომელიც პატრიარქის ლოცვა-კურთხევით მახათას მთაზე, ივერიის ღვთისმშობლის ხატის სახელობის ტაძრის ისტორიულ მშენებლობას უდგას სათავეში.
სახალხო აქციაში უკვე 145 ათასი ადამიანია ჩართული. ტაძარს მთელი ჩვენი საზოგადოება და ქართული ემიგრაცია ერთად აშენებს. იქმნება ცოცხალთა და გარდაცვლილთა წიგნი, რომელშიც ტაძრის აღმშენებელი მილიონობით ქართველის გვარ-სახელები ჩაიწერება.
ისტორიული მშენებლობის მონაწილეებს საკუთარი სახელის ნახვა ასევე შეუძლიათ ფონდის ვებ.გვერდზე www.makhata.ge ფონდის ვებ. Gგვერდის საშუალებით ისტორიულ მშენებლობაში გაწევრიანება უცხოეთში მცხოვრებ ქართველებსაც შეუძლიათ.
მახათას მთაზე დამონტაჟებულია კამერა, რომელის საშუალებითაც პირდაპირი ეთერის რეჟიმში მშენებლობის პროცესისთვის თვალყურის დევნება ფონდის ვებ. Gგვერდის საშუალებით ნებისმიერ მსურველს შეუძლია.
აქციაში მონაწილეობის მსურველებს, ყოველთვიურად 1 ლარის გადარიცხვა ნებისმიერი სატელეფონო ოპერატორიდან ასევე შეუძლიათ ნომერზე 0901 77 77 77.
17 აპრილს, 15 საათიდან რესპუბლიკის მოედნიდან გავლენ ავტობუსები მახათას მიმართულებით. მგზავრობა უფასოა.