პრესკონფერენციას უმასპინძლებენ შვედეთის საგანგებო და სრულუფლებიანი ელჩის მოვალეობის შემსრულებელი საქართველოსა და სომხეთში ოსა პუსარდი, ისრაელის საგანგებო და სრულუფლებიანი ელჩი საქართველოში იცხაკ გერბერგი, უნგრეთის საგანგებო და სრულუფლებიანი ელჩი საქართველოში შანდორ საბო.

რაულ ვალენბერგის ხსოვნისადმი მიძღვნილი ღონისძიებები:
18 აპრილი - ევროპის სახლი
10:00 სთ- ფოტოგამოფენა „რაულ ვალენბერგი - ადამიანი რომელმაც შეცვალა სამყარო" - გამოფენილი იქნება დოკუმენტური ფოტომასალა, რომელიც ასახავს რაულ ვალენბერგის მოღვაწეობას. გამოფენა გაგრძელდება 22 აპრილამდე.
16:30 სთ - სემინარი რაულ ვალენბერგის მოღვაწეობისა და ჰოლოკოსტის შესახებ. გამომსვლელები - საქართველოს სახალხო დამცველი გიორგი ტუღუში, რაულ ვალენბერგის ინსტიტუტის დირექტორი შვედეთში ქ-ნი მარი ტუმა. სემინარს დაესწრებიან ადამიანთა უფლებების სფეროში მომუშავე ყველა სამთავრობო, არასამთავრობო და საერთაშორისო ორგანიზაციის წარმომადგენელი, უნივერსიტეტების პროფესორები და სტუდენტები, ასევე საქართველოს სხვადასხვა არქივებისა და ეროვნული მუზეუმის თანამშრომლები. სემინარს გახსნის 9 წუთიანი დოკუმენტური ფილმი რაულ ვალენბერგის შესახებ.
18:00 სთ - სანთლების დანთების ცერემონია რაულ ვალენბერგისა და ჰოლოკოსტის მსხვერპლთა პატივის მისაგებად, რომელსაც საპატიო სტუმრები დაესწრებიან.
19:00 სთ - შვედური მხატვრული ფილმის „საღამო მშვიდობისა მისტერ ვალენბერგ" ჩვენება. დასწრება თავისუფალია.

19 აპრილს, 13:00 საათზე ნ. დუმბაძის სახელობის მზიურის პარკში თბილისის მერი გიგი უგულავა და შვედეთის, უნგრეთისა და ისრაელის საგანგებო და სრულუფლებიანი ელჩები საგანგებოდ ამ დღისათვის ჩამოტანილ ზეთისხილის ხეებს დარგავენ.
რაულ ვალენბერგი - შვედი დიპლომატი და ბიზნესმენი ვალენბერგი ბუდაპეშტში შვედეთის დიპლომატიური მისიის მეორე მდივნად 1944 წლის ივნისში დაინიშნა. მისი უმთავრესი საქმიანობა ებრაელების გადასარჩენი ოპერაციის მეთაურობა იყო. დამცავი შვედური პასპორტების გაცემითა და სპეციალური შენობების, „შვედური სახლების" დაქირავებით, რომელთაც ებრაელები უნდა შეეფარებინა, მან ათასობით უდანაშაულო სიცოცხლე გადაარჩინა.

1945 წლის იანვარში ვალენბერგი საბჭოთა სამხედროებმა დააკავეს. მისი ბედი დღემდე ბურუსითაა მოცული. რუსეთის მხარე აცხადებს, რომ იგი 1947 წელს საბჭოთა ციხეში გარდაიცვალა, თუმცა არსებობს მოწმეთა ჩვენებები, რომელთა მიხედვითაც, ვალენბერგი გაცილებით დიდხანს ცოცხლობდა.

არცთუ ბევრ შვედს მიუღია ისეთი საერთაშორისო აღიარება და ყურადღება, როგორც რაულ ვალენბერგს. 1981 წელს იგი რიგით მეორე ადამიანი გახდა, რომელსაც ამერიკის შეერთებული შტატების საპატიო მოქალაქის წოდება მიენიჭა. ასეთი პატივი საერთო ჯამში, შვიდ პიროვნებას ხვდა წილად - მათ შორის არიან უინსტონ ჩერჩილი და დედა ტერეზა. 1985 წელს ვალენბერგი საპატიო მოქალაქედ კანადამ სცნო, 1986 წელს კი - ისრაელმა.

მთელს მსოფლიოში ვალენბერგისადმი მიძღვნილი არაერთი მონუმენტი, ძეგლი და მემორიალი არსებობს. მისი ხსოვნა უკვდავქმნილია წიგნებში, მუსიკალურ ნაწარმოებებსა თუ ფილმებში; მის სახელს ატარებს შენობები, მოედნები, ქუჩები, სკოლები თუ სხვა დაწესებულებები.

2012 წელს ვალენბერგის დაბადებიდან 100 წელიწადი სრულდება, თუმცა მისი ჰუმანიტარული მიღწევები კვლავაც ცოცხლობს და თითოეულ ჩვენგანს რასიზმთან ბრძოლის პასუხისმგებლობას, უშიშრობისა და გამბედაობის აუცილებლობას გვახსენებს... რადგან ერთ ადამიანს სამყაროს შეცვლა შეუძლია.