60-დან 65 წლის მამაკაცებისთვის სახელმწიფო დახმარება, რეფერალური პროგრამის ფარგლებში იქნება გათვალისწინებული.
როგორც პარლამენტის დღევანდელ პლენარულ სხდომაზე შრომის, ჯანმრთელობისა და სოციალური დაცვის მინისტრმა ზურაბ ჭიაბერაშვილმა განაცხადა, ურგენტული, ონკოლოგიური, გულის ქირურგიისა და ზოგადი ამბულატორიის სახელმწიფო პროგრამები, 60-დან 65 წლის ასაკის მამაკაცებზე, რეფერალური დახმარების პროგრამის ფარგლებში გავრცელდება.
აღნიშნული საკითხი დღეს ,,ქრისტიან-დემოკრატების,, წევრმა მაგდა ანიკაშვილმა დასვა და სხდომაზე საპენსიო პაკეტში 60-65 წლამდე მამაკაცებისთვის, სახელმწიფო დაზღვევის შენარჩუნება მოითხოვა.
მინისტრის განცხადების შემდეგ კი, ანიკაშვილმა ჟურნალისტებთან განაცხადა, რომ აღნიშნული გადაწყვეტილებით, 100 ათასამდე მამაკაცს დახმარება შეუნარჩუნდა - „მართალია მათთვის ჯანმრთელობის დაცვის პოლისი არ იქნება გათვალისწინებული, მაგრამ სახელმწიფო პროგრამები შენარჩუნდება".
პარლამენტმა საპენსიო კანონმდებლობა დღეს მეორე მოსმენით განიხილა.
