თუ ყაზბეგის მოსახლეობა გააფორმებს ხელშეკრულებას, რომ ზაფხულის განმავლობაში გაზის ღირებულებას თავადვე დაფარავენ, გაზი ხვალვე ჩაირთვება. ამის შესახებ საპარლამენტო უმრავლესობის წევრმა აკაკი ბობოხიძემ ,,ქრისტიან-დემოკრატების,, ლიდერის გოირგი თარგამაძის საპასუხოდ განაცხადა, რომელმაც ყაზბეგის უწყვეტი გაზმომარაგება მოითხოვა.
ბობოხიძის განმარტებით, სახელმწიფო აფინასებს გაზის ღირებულებას ყაზბეგისთვის ყველაზე რთულ - ზამთრის პერიოდში. რაც შეეხება ზაფხულს, მისი თქმით, არავინაა წინააღმდეგი ყაზბეგს გაზი მიეწოდოს.
,,სახელმწიფო არც დაპირებია, რომ გაზი უფასოდ მთელი წლის განმავლობაში იქნება რომელიმე რაიონს, მათ შორის ყაზბეგს. მე მგონი ყველაფერი ნათელია, ხვალვე ჩაირთვება გაზი თუკი ყაზბეგის მოსახლეობა გააფორმებს ხელშეკრულებას, რომ ზაფხულის განმავლობაში ისინი გაზის ღირებულებას თავადვე დაფარავენ და ის იქნება ძალიან მინიმალური, ალბათ 5-6 ლარი. ზამთარში ხელშეკრულების გაფორმება, არგაფორმების მიუხედავად, სახელმწიფო იტოვებს ვალდებულებას ზამთარში დაფაროს მოსახლეობის მაგივრად გაზის ღირებულება,, - აღნიშნა დეპუტატმა.
მას ,,ქრისტიან-დემოკრატი,, ლევან ვეფხვაძე გამოეხმაურა და აღნიშნა, რომ მოსახლეობა უკვე სამი წელია მზადაა, რომ ზაფხულში თავად გადაიხადონ გაზის საფასური და სამი წელია ითხოვენ უწყვეტ გაზმომარაგებას.
