სოფლის მეურნეობის მინისტრი ზაზა გოროზია და ფინანსთა მინისტრი დიმიტრი გვინდაძე გურჯაანის რაიონს ეწვივნენ და ადგილობრივ მოსახლეობას მთავრობის ახალი ინიციატივა - სოფლის მეურნეობის პროდუქციის დღგ-ისგან გათავისუფლების შესახებ - პირადად გააცნეს.
შეხვედრის შემდეგ მინისტრებმა გურჯაანში მცხოვრები მიხეილ გოგიაშვილის ატმისა და ალუჩის ბაღები დაათვალიერეს.
დღემდე ქართულ სასოფლო-სამეურნეო პროდუქტს იმპორტირებულთან კონკურენცია უჭირდა, რადგან ადგილობრივი პროდუქციის რეალიზაციისთვის 18%-იანი დღგ-ის გადახდა იყო საჭირო. ეს იმპორტირებულ პროდუქციას უფრო მომგებიანს ხდიდა. ამ ცვლილებით, სოფლის მეურნეობის პროდუქციაზე ფასების მატების ტენდენცია შეჩერდება და ზოგ შემთხვევაში კი - შემცირდება.
"ჩვენთვის პრიორიტეტულია, რომ ქართველი ფერმერის შემოსავალი გაიზარდოს. სწორედ ამას უზრუნველყოფს საკანონმდებლო ცვლილება. ახალი კანონის თანახმად, ქართული პროდუქციის კონკურენტუნარიანობა გაიზრდება და გლეხებს მისი რეალიზაცია აღარ გაუჭირდებათ", - განაცხადა გოროზიამ ჟურნალისტებთან საუბრისას.
"საქართველოს საგადასახადო კოდექსში" შესული ცვლილებების მიხედვით, საქართველოში წარმოებული სოფლის მეურნეობის პროდუქციის მიწოდება მის სამრეწველო გადამუშავებამდე (სასაქონლო კოდის შეცვლამდე) დღგ-ისგან თავისუფლდება. დამატებითი ღირებულების გადასახადისგან თავისუფლდება ასევე ქვეყანაში წარმოებული მსხვილფეხა რქოსანი პირუტყვის, ღორის, ცხვრის და თხის ახალი, ან გაციებული ხორცის მიწოდება.
