"ქრისტიან-დემოკრატები" მიიჩნევენ, რომ ,,ნაციონალური მოძრაობს,, რეიტინგის ზრდა ნაწილობრივ "ქრისტიან-დემოკრატების" ხარჯზე აქვს.
როგორც NDI-ის კვლევის შედეგების კომენტირებისას ფრაქციის წევრმა ლევან ვეფხვაძემ განაცხადა, ეს ზრდა კერძოდ, ,,ქრისტიან-დემოკრატების რეიტინგის კლების ხარჯზე მოხდა.
მისი განმარტებით, ეს მოსალოდნელია ხოლმე, როცა ხდება პოლარიზება, სწორედ ამ პოლუსებზე ხდება გადანაწილება.
,,ივანიშვილის გუნდის შეცდომებმა მიგვიყვანა იქამდე, რომ მათი რეიტინგი სამჯერ დაეცა, ვიდრე პოლიტიკაში ივანიშვილის მოსვლის დროს ჰქონდათ. ამით ივანიშვილმა ორი ცუდი რამ გააკეთა. ჯერ ერთი, როგორც ჩანს, იმედგაცრუება გააჩინა. კერძოდ, 2 თვის წინ არჩევნებზე 75 პროცენტი აპირებდა მისვლას, ახლა კი 64 პროცენტი აპირებს. შესაბამისად, ეს ადამიანები ისევ პასიურ მდგომარეობაში დაბრუნდნენ”, - აღნიშნა ვეფხვაძემ.
მისივე თქმით, ივანიშვილმა მოკლა ოპოზიციური პარტიების ნაწილი, რადგან ყველას გაუნულა რეიტინგი.
,,ის ხალხი, რომელიც სოციალურ თემებზეა ორიენტირებული, რომელთაც ოჯახის თემა აინტერესებთ, თუ ჩვენგან წავიდნენ, ისევ ნაციონალურ მოძრაობაში წავიდნენ", - განაცხადა დეპუტატმა და იმედი გამოთქვა, რომ
ელექტორატს აქტიური საარჩევნო კამპანიის დროს დაიბრუნებენ.
NDI-ის კვლევის თანახმად, კითხვაზე, ხვალ რომ საპარლამენტო არჩევნები იყოს, რომელ პარტიას მისცემთ ხმას, გამოკითხულთა 47% "ერთიან ნაციონალურ მოძრაობას" ასახელებს. მეორე არჩევანის შემთხვევაში მმართველ გუნდს 2% ასახელებს.
რესპონდენტთა 10%-იანი მხარდაჭერით მეორე ადგილზეა კოალიცია "ქართული ოცნება". მეორე არჩევანის შემთხვევაში მას 3%-იანი მხარდაჭერა აქვს.
მესამე ადგილს გამოკითხულთა 3%-ის მხარდაჭერით "ქრისტიან-დემოკრატიული მოძრაობა" იკავებს. მეორე არჩევანის შემთხვევაში მას ხმას რესპონდენტთა 8% მისცემდა.
