სოფლის მეურნეობის მინისტრი ზაზა გოროზია და ფინანსთა მინისტრი დიმიტრი გვინდაძე ლაგოდეხის რაიონის სოფელ ჭიაურში ადგილობრივ მოსახლეობას შეხვდნენ და მთავრობის ახალი ინიციატივა სოფლის მეურნეობის პროდუქციის დღგ-სგან გათავისუფლების შესახებ პირადად გააცნეს.
შეხვედრის შემდეგ, რომელიც 25 მარტს გაიმართა, მინისტრები შუბითიძეების ოჯახს ეწვივნენ და კიტრის სათბური დაათვალიერეს.
დღემდე ქართულ სასოფლო-სამეურნეო პროდუქტს იმპორტირებულთან კონკურენცია უჭირდა, რადგან ადგილობრივი პროდუქციის რეალიზაციისთვის 18%--იან დღგ-ს გადახდა იყო საჭირო. ეს იმპორტირებულ პროდუქციას უფრო მომგებიანს ხდიდა. ამ ცვლილებით კი, სოფლის მეურნეობის პროდუქციაზე ფასების მატების ტენდენცია შეჩერდება და ზოგ შემთხვევაში შემცირდება.
„ადგილობრივ მოსახლეობას იმ პრობლემატურ საკითხებსა და მათი გადაწყვეტის გზებზე ვესაუბრეთ, რომელიც სოფელს აწუხებს. ამასთან, გავაცანით საკანონმდებლო ცვლილება, რომელიც ადგილობრივ პროდუქციას უფრო კონკურენტუნარიანს გახდის და მის რეალიზაციას მნიშვნელოვნად გაამარტივებს", განაცხადა ზაზა გოროზიამ ჟურნალისტებთან საუბრისას.
„საქართველოს საგადასახადო კოდექსში" შესული ცვლილებების მიხედვით, საქართველოში წარმოებული სოფლის მეურნეობის პროდუქციის მიწოდება მის სამრეწველო გადამუშავებამდე (სასაქონლო კოდის შეცვლამდე) დღგ-სგან თავისუფლდება. დამატებითი ღირებულების გადასახადისგან თავისუფლდება ასევე ქვეყანაში წარმოებული მსხვილფეხა რქოსანი პირუტყვის, ღორის, ცხვრის და თხის ახალი, ან გაციებული ხორცის მიწოდება.
