საქართველოს პარლამენტმა მინისტრთა განახლებული კაბინეტი 101 ხმით 16-ის წინააღმდეგ დაამტკიცა. კენჭისყრით, პარლამენტმა ნდობა გამოუცხადა მთავრობის პროგრამასაც - "ერთიანი საქართველო სიღარიბის გარეშე".
პარლამენტში პრემიერ-მინისტრი ნიკოლოზ გილაურის სიტყვით გამოსვლის შემდეგ მწვავე დებატები გაიმართა.
რიგგარეშე სესიაზე დღის პირველ ნახევარში მთავრობის თითქმის მთლიანი შემადგენლობა იყო წარმოდგენილი. მათ შორის არ იყო მხოლოდ ეკონომიკისა და მდგრადი განვითარების მინისტრი ვერა ქობალია, რომელიც ვიზიტით უცხოეთში იმყოფება.
მინისტრთა კაბინეტის მთლიანი შემადგენლობისთვის ნდობის გამოცხადების საკითხი რიგით მეშვიდე მინისტრის შეცვლის შემდეგ გახდა საჭირო.
ანდრია ურუშაძე ჯანდაცვის მინისტრის პოსტზე ზურაბ ჭიაბერაშვილმა ჩაანაცვლა.
