დღეს, 20 მარტს, პარლამენტი მთავრობის განახლებულ შემადგენლობას ნდობას გამოუცხადებს. მთავრობისთვის ნდობის გამოსაცხადებლად რიგგარეშე სხდომა დაინიშნა. მინისტრთა განახლებულ კაბინეტს და სამთავრობო პროგრამას დეპუტატებს პრემიერ-მინისტრი ნიკა გილაური წარუდგენს.
სხდომა 12:00 საათისთვის დაიწყება, მთავრობისთვის ნდობის გამოცხადების საკითხის განხილვას კი დეპუტატები 13:00 საათიდან დაიწყებენ.
მინისტრთა კაბინეტის ხელახალი დამტკიცების ვალდებულება პარლამენტს, ჯანდაცვის მინისტრის ანდრია ურუშაძის ზურაბ ჭიაბერაშვილით შეცვლის გამო გაუჩნდა. კერძოდ, მთავრობაში უკვე მე-7 მინისტრი იცვალება და მინისტრთა კაბინეტს კანონის თანახმად, ნდობა პარლამენტმა ხელახლა უნდა გამოუცხადოს.
შრომის, ჯანმრთელობისა და სოციალური დაცვის მინისტრის ცვლილების შესახებ პრემიერ-მინისტრმა განცხადება 15 მარტს გააკეთა. მინისტრთა კაბინეტისთვის ნდობის გამოცხადების საკითხი პარლამენტში 15 მარტსვე შევიდა.
საქართველოს პარლამენტის რეგლამენტის 184-მუხლის თანახმად, პარლამენტის მიერ, მთავრობის შემადგენლობისა და სამთავრობო პროგრამისათვის ნდობის გამოცხადების შემდეგ მთავრობის თავდაპირველი შემადგენლობის ერთი მესამედით, მაგრამ არანაკლებ 5 წევრით განახლების შემთხვევაში, საქართველოს პრეზიდენტი 1 კვირის ვადაში წარუდგენს პარლამენტს მთავრობის შემადგენლობას ნდობის მისაღებად, სრული შემადგენლობის უმრავლესობის მხარდაჭერა სჭირდება.
ასევე, პარლამენტს შეუძლია ნდობა არ გამოუცხადოს მთავრობის შემადგენლობას და სამთავრობო პროგრამას და იმავე გადაწყვეტილებაში დასვას ცალკეული მთავრობის წევრის აცილების საკითხი.