კონტროლის პალატამ მოსახლეობის დაკითხვისას, აჟიოტაჟის პრევენციის მიზნით, შესაძლოა, აუდიოვიდეოჩაწერა განახორციელოს. ამის შესახებ კონტროლის პალატის თავმჯდომარემ ლევან ბეჟაშვილმა პარლამენტის საფინანსო-საბიუჯეტო და იურიდიულ საკითხთა კომიტეტების გაერთიანებული სხდომის დაწყებამდე განაცხადა, სადაც მან კონტროლის პალატის ბოლოდროინდელი ქმედებების მართლზომიერებაზე უნდა ისაუბროს.
"ჩვენთვის აქ მნიშვნელოვანია საპარლამენტო კომიტეტების პოზიცია და იმის გარკვევა, თუ როგორ უნდა ხდებოდეს მომავალში ასეთი აჟიოტაჟის პრევენცია, მოსახლეობის უფრო ფართო ინფორმირებულობა და როგორ უნდა მოხდეს ვიდეო- და აუდიოჩანაწერების განხორციელება, რათა ასეთი სპეკულაციები და ინტერპრეტაციები ავიცილოთ თავიდან", - განაცხადა ბეჟაშვილმა.
ბეჟაშვილის პარლამენტში მიწვევა კომიტეტებს დღეს პარლამენტის თავმჯდომარემ დავით ბაქრაძემ დაავალა. მისი თქმით, პარლამენტმა უნდა მოისმინოს, რა ნაბიჯები გადაიდგა, რამდენად მიზანშეწონილი და კანონიერია კონტროლის პალატის მხრიდან განხორციელებული პროცესები.