პარლამენტის თავმჯდომარე დავით ბაქრაძე რუსეთის პრეზიდენტის მიერ კრასნოდარის მხარის გუბერნატორის აფხაზეთში რწმუნებულად დანიშვნას უპრეცედენტო გადაწყვეტილებად აფასებს.
როგორც მან ბიუროს დღევანდელ სხდომაზე განაცხადა, ეს მართლაც სერიოზული არგუმენტია ქართული მხარის ხელში, თუ რას აკეთებს რუსეთი აფხაზეთში და რისთვის სჭირდება მას აფხაზეთის ე.წ. დამოუკიდებლობა.
"ის არ კმარა, რომ იქ საოკუპაციო ჯარი დგას და ყველაფერი რუსეთისგან და ოკუპანტი ჯარის მხრიდან კონტროლდება? ახლა პირდაპირ უკვე პრეზიდენტის განკარგულების საფუძველზე დაუნიშნეს უფროსი ადგილობრივ ხელისუფლებას და მან ფაქტობრივად უნდა მართოს აფხაზეთი. ეს, ერთი მხრივ, ძალიან კარგად აჩვენებს რუსების დამოკიდებულებას აფხაზეთისა და აფხაზების მიმართ და კარგად აჩვენებს იმ ფაქტს, რაზედაც დგას რუსული პოლიტიკა, როდესაც საუბრობს აფხაზეთისა და სამხრეთ ოსეთის ე.წ. დამოუკიდებლობაზე. კრასნოდარის გუბერნატორი დაუნიშნეს უფროსად ე.წ. აფხაზეთის პრეზიდენტს, რომლის არჩევნებსაც ისინი აღიარებენ, განსხვავებით მთელი დანარჩენი მსოფლიოსგან. მეორე მხრივ, ძალიან შემაშფოთებელია, როდესაც ოლიმპიადის ქვეტექსტით ხდება ასეთი ნაბიჯების გადადგმა", - განაცხადა ბაქრაძემ.
მან მოუწოდა პარლამენტის კომიტეტებს, შეიმუშაონ განცხადება კომიტეტების ან პლენალური სხდომის დონეზე, რომლითაც მიმართავენ ოლიმპიადაში მონაწილე ქვეყნების პარლამენტებს და ოლიმპიურ კომიტეტს, ყურადღება მიაქციონ, თუ როგორი ნაბიჯები იდგმება რუსეთის მხრიდან.
"ოლიმპიადის ჩატარების კონტექსტში რუსეთის მხრიდან იდგმება ნეგატიური ნაბიჯი, რომლითაც ოკუპირებული ტერიტორიის დაკანონება და ანექსირება ხდება", - დასძინა ბაქრაძემ.
შეგახსენებთ, რომ ალექსანდრე ტკაჩევი რუსეთის პრეზიდენტმა დიმიტრი მედვედევმა ოკუპირებული აფხაზეთის დე-ფაქტო რესპუბლიკაში პრეზიდენტის სპეციალური წარმომადგენლის პოსტზე 11 მარტს დანიშნა.
