კონროლის პალატის თავმჯდომარე ლევან ბეჟაშვილის მტკიცებით, მისი უწყება კანონის მანდატის ფარგლებში მოქმედებდა. ამის შესახებ ბეჟაშვილმა პარლამენტის საფინანსო-საბიუჯეტო და იურიდიულ საკითხთა კომიტეტების გაერთიანებული სხდომის დაწყებამდე განაცხადა, სადაც მან კონტროლის პალატის ბოლოდროინდელი ქმედებების მართლზომიერებაზე უნდა ისაუბროს.
მისი თქმით, მიუხედავად იმისა, თუ რას ისახავდა მიზნად კონტროლის პალატის ირგვლივ ატეხილი აჟიოტაჟი, დღეს პარლამენტში იმსჯელებენ, თუ როგორ უნდა მოხდეს ასეთი აჟიოტაჟის პრევენცია მომავალში.
"ჩვენ ვფიქრობთ, რომ კონტროლის პალატა მოქმედებდა კანონის მანდატის ფარგლებში, კითხვები უკავშირდებოდა მხოლოდ "ქართული ოცნების" მიერ ფინანსური სახსრების კანონიერებას და მათ ასახვას სათანადო დოკუმენტაციაში. შესაბამისად, ეს აჟიოტაჟი მიზნად ისახავდა ამ პროცესის დისკრედიტაციას, მაგრამ ჩვენთვის აქ მნიშვნელოვანია საპარლამენტო კომიტეტების პოზიცია და იმის გარკვევა, თუ როგორ უნდა ხდებოდეს მომავალში ასეთი აჟიოტაჟის პრევენცია", - განაცხადა ჟურნალისტებთან ბეჟაშვილმა.
კონტროლის პალატის ხელმძღვანელისგან ახსნა-განმარტებების მოსმენა საპარლამენტო კომიტეტებს პარლამენტის თავმჯდომარემ დავით ბაქრაძემ დაავალა. მისი თქმით, პარლამენტმა უნდა მოისმინოს, რა ნაბიჯები გადაიდგა, რამდენად მიზანშეწონილი და კანონიერია უწყების მხრიდან განხორციელებული პროცესები.
