"მოქალაქეთა პოლიტიკური გაერთიანების შესახებ" კანონში ცვლილებებთან დაკავშირებით კონსულტაციები საბოლოოდ დასრულდა. ამის შესახებ ჟურნალისტებს იურიდიული საკითხთა საპარლამენტო კომიტეტის თავმჯდომარემ პავლე კუბლაშვილმა კამპანიია "ეს შენ გეხებას" წარმომადგენლებთან შეხვედრის შემდეგ განუცხადა.
კუბლაშვილის ინფორმაციით, ცვლილებების მიზანი მხოლოდ ფინანსური გამჭვირვალეობაა და საზოგადოებას არ უნდა დარჩეს კითხვები იმის შესახებ, თითქოს ის ვინმეს წინააღმდეგ იყოს შემუშავებული.
მისი თქმით, კანონში ცვლილებების პროექტი სავარაუდოდ, ხვალ იქნება მზად, ხოლო ოთხშაბათის ბიუროს სხდომაზე კი მისი ინიცირება მოხდება.
ხანძლივი კონსულტაციების შემდეგ, არასამთავრობო ორგანიზაციებმა და იურიდიულ საკითხთა საპარლამენტო კომიტეტის წევრებმა რიგ საკითხებზე შეთანხმება მოახერხეს. თუმცა დარჩა საკითხები, რომელზეც შეთანხმება ვერ შედგა.
დღევანდელი შეხვედრის დასრულების შემდეგ ახალგაზრდა იურისტთა ასოციაციის თავმჯდომარე თამარ ჩუგოშვილმა განაცხადა, რომ მთლიანობაში კანონმდებლობა გაუმჯობესდა. თუმცა მისივე თქმით, კამპანია გაგრძელდება ისეთ საკითხებზე, როგორიცაა ადმინისტრაციული რესურსების გამოყენება, კენჭისყრის დღის პროცედურები და სხვა საკითხები.