არასამთავრობო სექტორი საარჩევნო კანონმდებლობასთან დაკავშირებით, კონსულტაციების საბოლოო შედეგებს დღეს ელოდება. ამის შესახებ „კოალიაცია არჩევანი თავისუფლებისთვის" წარმომადგენელმა ირაკლი მელაშვილმა იურიდიული კომიტეტის თავმჯდომარებ პავლე კუბლაშვილთან შეხვედრის დაწყებამდე ჟურნალისტებთან განაცხადა.
მისი თქმით, ორგანიზაციებმა იურიდიულ საკითხთა კომიტეტს საკუთარი ხედვები უკვე წარუდგინეს, არსებობს სიტყვიერი შეთანხმება რამოდენიმე საკითხზე, მაგრამ თითოეული მათგანი დოკუმენტში უნდა აისახოს.
,,არის თემები, რომლებიც ღიად რჩება. მათ შორის არის ამომრჩეველთა მოსყიდვის თემა; არჩევნებიდან პარტიების მოხსნის პროცედურა; ჯარიმების შემცირების საკითხი; შემოწიროლობების ლიმიტი - ერთ იურიდიულ პირში მომუშავე ადამიანების მიერ პოლიტიკური პარტიებისთვის გადარიცხულმა თანხამ არ შეიძლება, ჯამურად 500 000 ლარს გადააჭარბოს. ჩვენი არგუმენტის თანახმად, ამით იზღუდება ადამიანის უფლება, რომ იმ პოლიტიკურ პარტიას შეწიროს თანხა, რომელსაც მხარს უჭერს" - აღნიშნა მელაშვილმა.
პავლე კუბლაშვილთან არასამთავრობო ორგანიზაციების შეხვედრა დახურულ კარს მიღმა მიმდინარეობს.
