დღეს, ქარელში პოლიტიკური კოალიცია „ქართული ოცნების" რეგიონული ოფისი გაიხსნა. ღონისძიებას კოალიციის ლიდერი ბიძინა ივანიშვილი და „თავისუფალი დემოკრატების" ლიდერი ირაკლი ალასანია ესწრებოდნენ.
ბიძინა ივანიშვილის განცხადებით „ქართული ოცნება" არჩევნებისთვის მოახერხებს მთელი საქართველოს ერთ მუშტად შეკვრას და ამ მოძალადე ხელისუფლებისგან გათავისუფლებას.
„ქართლი საქართველოს გულია, თქვენ გულიანი ქართველები ხართ და არ შეშინდეთ, არ დაემსგავსოდ უგულო და მშიშარა პრეზიდენტს. კარგად გაანალიზეთ არსებული სიტუაცია. ძალა ერთობაშია, არჩევნებზე ვთქვათ სწორი სიტყვა და გავთავისუფლდეთ მოძალადე ხელისუფლებისგან" - განაცხადა ბიძინა ივანიშვილმა.
ირაკლი ალასანიას განცხადებით კი ძალიან მალე, დაიწყება იმ პოლიტიკური ნაგვის გატანა, რომლის გატანაზეც დღეს მერია უარს ამბობს.
"დარჩა შვიდი თვე, ძალიან მალე, არჩევნების გზით დაიწყება პოლიტიკური ნაგვის გატანა, რომელსაც გავაყოლებთ იმ პოლიტიკურ ძალას, რომელმაც ჩვენი ქვეყანა მიიყვანა უმუშევრობის, სიღატაკის და ერთმანეთთან დაპირისპირების უკიდურეს ზღვარზე" - განაცხადა ირაკლი ალასანიამ.
კოალიცია „ქართული ოცნების" ქარელის ოფისის ხელმძღვანელად შმაგი კოპაძე აირჩიეს.