"ქრისტიან-დემოკრატების" ლიდერები გიორგი ახვლედიანი და მაგდა ანიკაშვილი დღეს გორში, საბიაშვილების ოჯახს ესტუმრნენ. საპარლამენტო უმცირესობის წევრები 10 წლის გუკა საბიაშვილის ჯანმრთელობის მდგომარეობით დაინტერესდნენ, რომელსაც შეზღუდული შესაძლებლობის პირის სტატუსი აქვს მინიჭებული.
"თბილისისგან განსხვავებით, სადაც ასეთი სტატუსის მქონე ბავშვებს მერია ეხმარება, რეგიონებში ოჯახები მთლიანად დაუცველები არიან. ამ ბავშვებს სჭირდებათ ძვირადღირებული მკურნალობა, მედიკამენტები, რისი საშუალებაც უმეტეს შემთხვევაში ოჯახებს არა აქვთ. ჩვენ ვითხოვთ სექტემბრიდან, როცა ძალაში შევა დაზღვევის ახალი პროგრამა, რეგიონებში მცხოვრებ შეზღუდული შესაძლებლობების მქონე ბავშვებს აუცილებლად დაურიგდეს ჯანდაცვის პოლისები. ამასთან, ეს პოლისები უნდა იყოს დიფერენცირებული და დასაზღვევი კატეგორიის საჭიროებებს მორგებული" - განაცხადა მაგდა ანიკაშვილმა.
მისივე ინფორმაციით, მიმდინარე წლის მონაცემებით, საქართველოს რეგიონებში ამ სტატუსის მქონე 3 ათასამდე ბავშვი ცხოვრობს და მათი მკურნალობისთვის დაახლოებით 180 ათასი ლარია საჭირო.
