საზოგადოებრივი აზრის კვლევისა და სტრატეგიული კონსალტინგის კომპანია ACT-ში განმარტავენ, რომ მომსახურების ხარისხი რომ ნებისმიერი ბიზნესისთვის ერთ-ერთი უმნიშვნელოვანესი ფაქტორია, ამ თემაზე უკვე აღარავინ დავობს. სამაგიეროდ, ხშირად მოისმენთ ქართულ სერვისთან დაკავშირებით არაერთგვაროვან პოზიციებს.

ACT დაინტერესდა როგორ აფასებენ დედაქალაქის მცხოვრებნი სხვადასხვა სფეროებში არსებულ მომსახურების დონეს და სთხოვა მათ 5 ქულიანი სისტემით შეეფასებინათ საკუთარი კმაყოფილების ხარისხი.

აღმოჩნდა, რომ თბილისის მოსახლეები ყველაზე მეტად კმაყოფილი აფთიაქების მომსახურებით არიან. აფთიაქებს ოდნავ ჩამორჩება საყოფაცხოვრებო და ტექნიკის მაღაზიები.

სადაზღვევო კომპანიები კი უკანასკნელ ადგილას აღმოჩდნენ, თუმცა მათი შეფასება ნეიტრალურია და დადებითისკენ მეტად იხრება, ვიდრე უარყოფითისკენ.

საინტერესო ფაქტია ისიც, რომ საჯარო სამსახურები მესამე ადგილზე აღმოჩდნენ 4,08 ქულით და საბანკო სექტორიც (3,92) კი უკან ჩამოიტოვეს.

რაც შეეხება ზოგადად მომსახურების სფეროს ხარისხს, აღნიშნული მონაცემების მიხედვით ნათლად გამოიკვეთა ტენდენცია - არც ერთ სფეროს არ დაუმსახურებია ნეგატიური შეფასება, რაც იმის დასტურია, რომ საჯარო და ბიზნეს სექტორიც საკმაო ყურადღებას უთმობს მომხმარებელთა კმაყოფილების დონეს.

კომპანიაში განმარტავენ, რომ 2012 წლის თებერვალში რეპრეზენტატული შერჩევის საფუძველზე გამოიკითხა თბილისის 400 ზრდასრული მაცხოვრებელი. მონაცემთა სტატისტიკური ცდომილება არ აღემატება 4.8%.