საქართველოს ეკონომიკისა და მდგრადი განვითარების მინისტრი თბილისში ვიზიტით მყოფ უკრაინის დელეგაციას შეხვდა. დელეგაციაში, რომელსაც ქ. ოდესის მერი ალექსეი კოსტუსევი ხელმძღვანელობს, ხელისუფლებისა და ბიზნესსექტორის წარმომადგენლები შედიან.
ვერა ქობალიამ უკრაინული დელეგაციის წარმომადგენლებს მისასალმებელი სიტყვით მიმართა, სადაც აღნიშნა, რომ უკრაინა საქართველოს ერთ-ერთი უმნიშვნელოვანესი პარტნიორი ქვეყანაა, რომელთანაც მჭიდრო ეკონომიკურ-პოლიტიკური ურთიერთობები გვაკავშირებს. მინისტრმა უკრაინელ სტუმრებს საქართველოში მიმდინარე ეკონომიკური პროცესები, საინვესტიციო გარემო და ტურისტული პოტენციალი გააცნო.
გარდა ხელისუფლების წარმომადგენლებთან შეხვედრებისა, უკრაინელ ბიზნესმენებს საშუალება ჰქონდათ, პირისპირ შეხვედროდნენ ქართველ კოლეგებს და უშუალოდ მათგან მიეღოთ ინფორმაცია ბიზნესის ამა თუ იმ სფეროში არსებული მდგომარეობის შესახებ - საქართველოს ეროვნული საინვესტიცო სააგენტოს ორგანიზებით გაიმართა ბიზნესშეხვედრები ქართველ და უკრაინელ ბიზნესმენებს შორის.
უკრაინის დელეგაციაში შემავალი ბიზნესმენები წარმოადგენენ კომპანიებს სამშენებლო, ტელეკომუნიკაციის, ტრანსპორტის, ტურიზმის, სოფლის მეურნეობის და მსუბუქი მრეწველობის სექტორებიდან. მათი მიზანი საქართველოში ბიზნესპარტნიორების მოძიება და მათთან საქმიანი ურთიერთობის დამყარებაა.