საქართველოს მთავრობამ აზიის განვითარების ბანკთან ახალი საავტომობილო მაგისტრალების, ჰიდროელექრტოსადგურებისა და წყალმომარაგების სისტემების მშენებლობა-რეაბილიტაციის საკითხები განიხილა. ფინანსთა სამინისტროს ინფორმაციით, ქართული დელეგაცია დელეგაცია, ფინანსთა მინისტრის დიმიტრი გვინდაძის და რეგიონული განვითარებისა და ინფრასტრუქტურის მინისტრის რამაზ ნიკოლაიშვილის შემადგენლობით, ფილიპინების დედაქალაქ მანილაში იმყოფება, სადაც აზიის განვითარების ბანკის ცენტრალური ოფისი მდებარეობს. მიმდინარე საინვესტიციო პროექტების ფარგლებში აზიის განვითარების ბანკის მიერ საქართველოსთვის დღემდე გამოყოფილია შეღავათიანი ფინანსური რესურსი დაახლოებით 395 მლნ აშშ დოლარის ოდენობით.
აზიის განვითარების ბანკი ერთ-ერთი უმსხვილესი საერთაშორისო საფინანსო ინსტიტუტია. საქართველო ბანკის წევრი 2007 წლის თებერვალში გახდა. ADB სესხების გაცემისა და ტექნიკური მხარდაჭერის გაწევის გზით აფინანსებს წევრი ქვეყნებისათვის პრიორიტეტულ პროგრამებსა და პროექტებს. ამჟამად აზიის განვითარების ბანკის დაფინანსება საქართველოში მოიცავს ისეთ სექტორებს, როგორიცაა: კომუნალური და მუნიციპალური ინფრასტრუქტურა, ტრანსპორტი. ბანკის მიერ ხორციელდება საგზაო დერეფნის საინვესტიციო პროგრამა, რომელიც მოიცავს ქობულეთის ახალი შემოვლითი გზის მშენებლობას.
საქართველოს ეკონომიკური გუნდის წარმომადგენლები აზიის განვითარების ბანკის პრეზიდენტს, ჰირუჰიკო კუროდას შეხვდნენ და იმსჯელეს საქართველოსა და აზიის განვითარების ბანკის თანამშრომლობის პერსპექტივებზე. მხარეებმა განიხილეს ისეთი მნიშვნელოვანი საკითხები, როგორიცაა ახალი საავტომობილო მაგისტრალების, ჰიდროელექრტოსადგურებისა და წყალმომარაგების სისტემების მშენებლობა-რეაბილიტაცია და ნაპირსამაგრი სამუშაოს ჩატარება, ასევე ხაზი გაესვა საქართველოს, როგორც სტაბილური საფინანსო ინსტიტუტის, განვითარების როლს რეგიონალურ ჭრილში.
აზიის განვითარების ბანკის აღმასრულებელმა სტრუქტურებმა უკვე დაიწყეს აღნიშნული საკითხების დეტალური განიხილავა პროექტების პრიორიტეტების განსაზღვრის მიზნით.