სს "მინა" 2012 წლის ბოლომდე ქარხანაში 24 მილიონი დოლარის ინვესტიციის განხორციელებას გეგმავს, მათ შორის 4 მილიონი დოლარის ინვესტირება მარტში მოხდება. ახალი ინვესტიციები ქარხნის რეკონსტრუქციას, კომპანიის საწარმოო სიმძლავრის გაორმაგდებასა და გაყიდვების მოცულობის გაზრდას გულისხმობს.
კომპანია მიზნად ისახავს, დააკმაყოფილოს შიდა ბაზრის მოთხოვნის 75-80%, ასევე წარმოებული პროდუქციის 10-15% გაიტანოს ექსპორტზე.
"ინვესტირება მოიცავს ქარხანაში მინის სახარში ღუმელისა და მანქანა-დანადგარების განახლებას, დამატებით ახალი ღუმელის შეძენას, მანქანა-დანადგარებითა და საწარმოო ხაზებით, ფაქტობრივად, მოხდება ქარხნის რეკონსტრუქცია. გარდა იმისა, რომ განახლდება მოძველებული დანადგარები, ამორტიზებული ღუმელი და შეკეთდება მანქანა-დანადგარები, ეს საშუალებას მოგვცემს, წლიური წარმოების მოცულობა გავზარდოთ", - განაცხადა "მინას" მარკეტინგისა და გაიდვების დირექტორი თამაზ ჭინჭარაულმა.
სს "მინას" ამჟამინდელი საწარმოო წლიური სიმძლავრე 30 ათას ტონას შეადგენს, რაც საშუალოდ 100 მილიონ ბოთლს ნიშნავს წელიწადში. კომპანია აღჭურვილია წამყვანი ევროპული კომპანიების მიერ წარმოებული მანქანა-დანადგარებით. მზა პროდუქციის ხარისხი კონტროლდება, როგორც ვიზუალურად, ასევე უახლესი მაკონტროლებელი მანქანების მეშვეობით. შეფუთვის პროცესი თითქმის მთალინად ავტომატიზებულია. კომპანიას შესაძლებლობა აქვს, აწარმოოს 200 მილილიტრიდან 1,5 ლიტრამდე მოცულობის ნებისმიერი ფორმისა და ფერის მინის ტარა, როგორც სერიული, ასევე ექსკლუზიური მოხმარებისთვის.
სს "მინა" სავაჭრო-სამრეწველო პალატის, საქართველოს ბიზნესასოციაციისა და საქართველოში ამერიკის სავაჭრო პალატის წევრია, სადაც აქტიურად მონაწილეობს ბიზნესის განვითარებისთვის საჭირო საკითხების განხოლვასა და განხორციელებაშიც. კომპანია ასევე ფლობს ხარისხის მართვის ISO 9001:2008 საერთაშორისო სერთიფიკატს. "მინაში" ხარისხის მართვის კუთხით მოკვლევა ოქტომბერში დაიწყო, რომელიც გერმანულმა მასერთიფიცირებელმა ორგანომ TUV SUD Management Service Gmbh-მა ჩაატარა.
შეგახსენებთ, რომ ქარხანამ ფუნქციონირება 1987 წლის ივლისში ქსნის მინის ტარის ქარხნის სახელწოდებით დაიწყო, რომელიც 3 ღუმელითა და 8 საწარმოო ხაზით ერთ-ერთი ყველაზე დიდი და თანამედროვე ქარხანა იყო მთელ საბჭოურ სივრცეში.1995 წელს ქარხანას სააქციო საზოგადოება "მინა" (100 პროცენტი სახელმწიფო წილით) ეწოდა. ხოლო 1997 წლიდან დღემდე ქარხნის მფლობელია თურქული სამრეწველო ჰოლდინგი "შიშეჯამი", რომელიც 2 მილიარდ დოლარზე მეტი წლიური გაყიდვების მოცულობით მსოფლიოში მინის მწარმოებელი კომპანიების ექვსეულში შედის და 60-ზე მეტ შვილობილ კომპანიას აერთიანებს.