აჭარის მთავრობა ტურიზმის სფეროს განვითარებისთვის სტრუქტურულ რეორგანიზაციას იწყებს. აჭარის მთავრობის თავმჯდომარის ლევან ვარშალომიძის გადაწყვეტილებით, აჭარის ტურიზმისა და კურორტების დეპარტამენტი ორად გაიყოფა.
„ვიცით, რომ ტურიზმის დეპარტამენტის ძირითადი მიზანი ტურისტების მოზიდვაა, თუმცა შეიქმნება მეორე კურორტების დეპარტამენტი, რომლის ძირითადი მოვალეობა კურორტების მართვა იქნება. რაც არ უნდა ბევრი ტურისტი მოვიზიდოთ ეს კარგია, მაგრამ მართვა ყველაზე მნიშვნელოვანია - მართვა კურორტი ბეშუმის, კურორტი გომარდულის. უკვე იმდენი ახალი ადგილი იქმნება, რომ მას უკვე ცენტრალიზებული მართვა სჭირდება"- განაცხადა აჭარის მთავრობის თავმჯდომარემ.
აჭარის ტურიზმისა და კურორტების დეპარტამენტის თავმჯდომარე დავით ქიქავა ამბობს, რომ დეპარტამენტის მუშაობის სპეციფიკა გაიყოფა.
„ტურიზმის დეპარტამენტი ძირითადად იმუშავებს ტურისტების მოზიდვაზე, ანუ აჭარის ტურისტული პოტენციალის პოპულარიზაციაზე, როგორც საზღვარგარეთ ასევე შიდა ბაზარზე.
ხოლო კურორტების დეპარტამენტი დასაქმებული იქნება ადგილობრივი ინფრასტრუქტურის განვითარებით - ეს იქნება მომსახურების დონის ამაღლება, თუ ახალი მიმართულებების დანერგვა"- განაცხადა დავით ქიქავამ.