იმ მეწარმეს, რომელიც ფიქსირებულ გადასახადზე გადავა, უკვე შეძენილი GPRS სისტემის სალარო აპარატის უკან დაბრუნება შეეძლება. როგორც სააგენტო „ჯი-ეიჩ-ენს" შემემოსავლების სამსახურის უფროსმა ჯაბა ებანოიძემ განუცხადა, თუ კი თონე ფიქსირებულ გადასახადზე გადავა, მას შემოსავლების სამსახურიდან ნაყიდი GPRS სისტემის სალარო აპარატის უკან დაბრუნების საშუალება მიეცემა. როგორც ებანოიძემ განაცხადა, შემოსავლების სამსახური დაიანგარიშებს სალარო აპარატის მეპატრონის მიერ ექსპლუატაციის ვადას და სალარო აპარატის საერთო ღირებულებას გამოაკლებს.
ძველი აპარატების ახლით ჩანაცვლების პროცესი 1 იანვარს უნდა დასრულებულიყო. თუმცა შემდგომ შემოსავლების სამსახურმა გადაწყვეტილება მიიღო და ძველი სალარო აპარატების ახლით ჩანაცვლების პროცესი 2012 წლის 1 იანვრის ნაცვლად, 2012 წლის 1 თებერვლამდე გადასწია.
აღსანიშნავია, რომ GPRS სისტემის საკონტროლო - სალარო აპარატის ღირებულება 290 ლარია და ნებისმიერ გადამხდელს შესაძლებლობა აქვს ბანკის განვადებით ისარგებლოს. განვადება უპროცენტოა და თანხის გადახდა ნაწილდება 12 თვეზე.
საგადასახადო კოდექსში შესული ცვლილებების თანახმად, გადამხდელთა ერთი ნაწილი, საერთოდ გათავისუფლებულია სალარო აპარატების ქონის ვალდებულებისგან. საქმე ეხება მიკრო ბიზნესის სტატუსის მქონე მეწარმეებს.
მეწარმეთა დიდ ნაწილს კი, შემოსავლების სამსახურის გადაწყვეტილებით, ახალი აპარატები უსასყიდლოდ ურიგდებათ. GPRS სალარო აპარატები უფასოა მცირე ბიზნესის სტატუსის მქონე გადამხდელებისთვის.
შეგახსენებთ, რომ საქართველოს მთავრობის №58 დადგენილების მიხედვით, „მიკრო და მცირე ბიზნესის სტატუსის მქონე პირებისათვის აკრძალული საქმიანობებისა და საქმიანობებისა და შემოსავლების სახეების, რომლებიც არ დაიბეგრება ან/და, რომლებზეც არ გავრცელდება სპეციალური დაბეგვრის რეჟიმები, განსაზღვრის შესახებ" საქართველოს მთავრობის 2010 წლის 29 დეკემბრის №415 დადგენილებაში ცვლილებები შევიდა. ცვლილების თანახმად კი თონეებს სურვილისამებრ შესაძლებლობა ეძლევათ ფიქსირებულ გადასახადზე გადავიდნენ და მათთვის გადასახადის განაკვეთ, თითოეულ თონეზე, 100 ლარით განისაზღვრა.
„საქართველოს მთავრობა უფლებამოსილია, ადგილობრივი თვითმმართველობის შუამდგომლობის საფუძველზე, ფიქსირებული გადასახადით დაბეგვრის ობიექტის ადგილმდებარეობის ან/და ფიქსირებული გადასახადით დასაბეგრი საქმიანობის სეზონურობის გათვალისწინებით, ფიქსირებული გადასახადის დადგენილი განაკვეთი შეამციროს/გაზარდოს არა უმეტეს 50%-ის ოდენობით"- ნათქვამია დადგენილებაში.