თონეების შემდეგ მთავრობა ფიქსირებულ გადასახადს უკვე სილამაზის სალონებისთვის აწესებს. პროექტზე მუშაობა ჯერ არ დასრულება, თუმცა პირველადი პროექტის თანახმად, დედაქალაქში სილამაზის სალონებისათვის ფიქსირებული გადასახადის მოცულობა, თვეში 100-50 ლარი იქნება.
როგორც სააგენტო „ჯი-ეიჩ-ენს" შემოსავლების სამსახურის უფროსმა ჯაბა ებანოიძემ განუცხადა, სალონებისთვის ფიქსირებული გადასახადის მოცულობის დაწესებაზე შემოსავლების სამსახური ინტენსიურად მუშაობს. ებანოიძის განმარტებით, თბილისის ცენტრში სილამაზის სალონებისათვის ფიქსირებული გადასახადის ოდენობა სავარაუდოდ 100 ლარი იქნება, გარეუბნებში სავარაუდოდ 70 ლარი, ხოლო პერიფერიებში კი 50 ლარი.
აღსანიშნავია, რომ ფიქსირებული გადასახადი სალონებში არსებული "სამუშაო სკამების" რაოდენობის მიხედვით დაწესდება, თუმცა განსხვავებული იქნება სტილისტისა და „პედიკურშას" ფიქსირებული გადასახადი და როგორც ჯაბა ებანოიძე განმარტავს, დედაქალაქის ცენტში მდებარე სალონში პედიკურის სპეციალისტის ფიქსირებული გადასახადი სავარაუდოდ 50 ლარი იქნება, ხოლო გარეუბნებში კი 30 ლარი.
შეგახსენებთ, რომ მთავრობამ პირველი ეტაპისთვის ფიქსირებული გადასახადები თონეებთან მიმართებაში უკვე შემოიღო. მეწარმეს სურვილისამებრ შესაძლებლობა ეძლევა ფიქსირებულ გადასახადზე გადავიდეს და თითოეულ თონეზე თვეში ფიქსირებული 100 ლარი გადაიხადოს. ფიქსირებულ გადასახადზე გადასვლის შემდეგ, მეწარმეს აღარ მოუწევს ბუღალტერიის წარმოება და აღარ ექნებათ სალარო აპარატის გამოყენების აუცილებლობა. შემოსავლების სამსახური ფიქსირებული გადასახადის ზღვარს უახლოეს პერიოდში სხვა ტიპის დაწესებულებულებებისთვისაც განსაზღვრავს.
