იერუსალიმის ჯვრის მონასტერთან დაკავშირებული ყველა საკითხი ეკლესიასთან, საქართველოს საპატრიარქოსთან ძალზე მჭიდრო კავშირის შედეგად გადაწყდება. ამის შესახებ პრეზიდენტის პრესსპიკერმა მანანა მანჯგალაძემ დღევანდელ ტრადიციულ ბრიფინგზე განაცხადა.
მისივე თქმით, იერუსალიმის ჯვრის მონასტრის საქართველოსთვის დაბრუნების საკითხზე შესაბამისი კონსულტაციები დაწყებულია საქართველოს საპატრიარქოსთან.
"ეს თემა საკმაოდ კომპლექსურ მიდგომას საჭიროებს, ჩართულია ჩვენი საგარეო საქმეთა სამინისტრო, ისრაელში ჩვენი საელჩო, ამ საქმეს მოხმარდება შესაბამისი საექსპერტო ცოდნა", - განაცხადა მანანა მანჯგალაძემ.
საქართველოს პრეზიდენტმა მიხეილ სააკაშვილმა 25 თებერვალს გორში თავდაცვის ეროვნულ აკადემიაში სიტყვით გამოსვლისას განაცხადა, რომ იერუსალიმის ჯვრის ქართული მონასტრის დაბრუნებაზე, გამოსყიდვაზე სპეციალურად შექმნილი ჯგუფი მუშაობს.
