„საქართველოს ბანკი" ენერგოეფექტურობის სესხებს მცირე და საშუალო ბიზნესზეც გასცემს. ბანკის ინფორმაციით, ენერგოკრედიტი გაიცემა ევროპის რეკონსტრუქციის და განვითარების ბანკის (EBRD) მიერ დაფინანსებული, ენერგოეფექტურობის პროგრამის ფარგლებში, რომლისთვისაც EBRD-იმ საქართველოს ბანკს 10 მლნ აშშ დოლარის მოცულობის სესხი გამოუყო.
„საქართველოს" ბანკის მენეჯმენტის ინფორმაციით, ხსენებული საკრედიტო ხაზიდან საქართველოს ბანკი გასცემს ენერგოკრედიტებს ფიზიკური პირებისთვის, კორპორატიული კლიენტებისთვის და ახლა უკვე მცირე და საშუალო ბიზნესისთვის.
„ამ დროისთვის. დაახლოებით 5 მლნ აშშ დოლარი წარმატებითაა ათვისებული კორპორატიული და სამომხმარებლო სექტორების მიერ.
ენერგოკრედიტი ეხმარება ფიზიკურ, იურიდიულ და ახლა უკვე მცირე და საშუალო ბიზნესის წარმომადგენლებს, გამოიყენონ ენერგიის დამზოგველი, თანამედროვე გადაწყვეტები და ამით მნიშვნელოვნად შეამცირონ ენერგიის მოხმარების ხარჯი, საქართველოს ბანკი კი სთავაზობს სესხებს, ხელსაყრელი პირობებით"- განმარტავენ „საქართველოს ბანკში".
მათივე ინფორმაციით, კომპანიებს ენერგოკრედიტი დაეხმარება დაზოგონ ენერგია მათ წარმოებაში, იმავე დანახარჯებით მეტი პროდუქცია აწარმოონ და ბაზარზე მათი ბიზნესის კონკურენტუნარიანობა გაზარდონ. ენერგოკრედიტით სარგებლობისას, სესხზე ხელსაყრელი პირობების გარდა, კომპანიებს შესაძლებლობა აქვთ სრულიად უსასყიდლოდ ჩაიტარონ ენერგოაუდიტი და მიიღონ საერთაშორისო კვალიფიციური ექსპერტების კონსულტაცია.
ენერგოკრედიტის მოცულობა 20,000 აშშ დოლარიდან, 500,000 აშშ დოლარამდე განისაზღვრება, სესხის ვადა - 60 თვემდე, თანამონაწილეობა - არ მოითხოვება.
„ენერგოკრედიტის მიღების პროცედურა შემდეგია: მცირე და საშუალო ბიზნესის წარმომადგენელი, აკეთებს განაცხადს სესხზე საქართველოს ბანკში, რის შემდეგაც მომხმარებლის ბიზნესს აუდიტს უტარებს EBRD-ის დაქირავებული კონსულტანტები და შედეგად დგინდება, თუ რამდენად ეფექტური გახდება საწარმო ენერგოკრედიტით სარგებლობის შემდეგ. ასევე, დაითვლება კონკრეტულად რა რაოდენობის ეკონომიას გაუწევს წარმოებას, ენერგოკრედიტით სარგებლობა. EBRD-ის კონსულტანტების აუდიტის დასკვნის შემდეგ, საქართველოს ბანკი გასცემს სესხს.
დეტალური ინფორმაცია ენერგოეფექტურობის პროექტზე, ასევე რჩევები ენერგიის დამზოგავ მოწყობილობებთან დაკავშირებით, განთავსებულია ვებგვერდზე: www.energocredit.ge"- აცხადებენ „საქართველოს ბანკში".