კონსერვატიული პარტიის შეფასებით, "კობალაძის გამართლებამ დაადასტურა, რომ 6 მაისს მუხროვანში არანაირ ამბოხებას ადგილი არ ჰქონია".
ამის შესახებ "კონსერვატორების" დღევანდელ განცხადებაშია ნათქვამი.
"თბილისის საქალაქო სასამართლომ დღეს კობა კობალაძეს მოუხსნა შეიარაღებული ამბოხების ბრალდება, რაც ადასტურებს იმ გარემოებას, რომ 6 მაისს მუხროვანში არანაირი ამბოხების მცდელობას ადგილი არ ქონია და რომ ეს იყო თბილისში მიმდინარე საპროტესტო აქციების გადაფარვის მიზნით ხელისუფლების მიერ ინსპირირებული პროვოკაცია", - ნათქვამია განცხადებაში.
მასში ასევე აღნიშნულია, რომ "საერთაშორისო მონიტორინგის პირობებში ხელისუფლებამ ვეღარ შესძლო მტკიცებულებების გაყალბება და იძულებული გახდა პოლიტიკური პატიმარი - კობა კობალაძე გაეთავისუფლებინა".
"ჩვენ, კონსერვატორები, გამოვდივართ ინიციატივით - დაიწყოს დამოუკიდებელი საერთაშორისო გამოძიება, რომელიც დაადგენს რეალურად რა მოხდა 6 მაისს მუხროვანში, რის საფუძველზეც გათავისუფლებული იქნებიან ამჟამად პატიმრობაში მყოფი სხვა პოლიტიკური პატიმრები, პასუხისგებაში მიეცემიან ამ პროვოკაციის ინსპირატორები, ხოლო მიხეილ სააკაშვილის მიმართ დაიწყება იმპიჩმენტის პროცედურა", - აღნიშნულია განცხადებაში.
