აჭარაში მოქმედი საფინანსო ინსტიტუტების მიერ 2011 წელს საერთო ჯამში 757 მლნ. 803 ათასი ლარი გაიცა. 2012 წლის 1-ლი იანვრის მონაცემებით, აჭარის ავტონომიურ რესპუბლიკაში საფინანსო საქმიანობას 13 ბანკი და 6 მიკროსაფინანსო ორგანიზაცია ახორციელებს.
როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროში განუმარტეს, აღნიშნული საფინანსო ინსტიტუტების მიერ 2011 წელს საერთო ჯამში გაცემულ იქნა 757 მლნ. 803 ათასი ლარი. 2011 წელს აჭარაში გაცემული სესხების მოცულობა 59,5 %-ით აღემატება 2010 წელს გაცემულ სესხების მოცულობას.
სამინისტროს ინფორმაციით, 2011 წლის განმავლობაში აჭარის რეგიონში მოღვაწე 13 ბანკისა და 6 მიკროსაფინანსო ორგანიზაციის მიერ ეროვნულ და უცხოურ ვალუტაში გაცემული თანხიდან შიდა მეურნეობებზე გაცემულია 419 მლნ. 218 ათასი ლარი და სხვა დარგებზე კი 338 მლნ. 585 ათასი ლარი ლარი.
