შემოსავლების სამსახური მეწარმეებს აფრთხილებს, GPRS სისტემის საკონტროლო - სალარო აპარატების შეძენის ვადა პირველ თებერვალს იწურება. სამსახურის ინფორმაციით, უკვე დარეგისტრირებულია 90 000-მდე სალარო აპარატი. იმ მეწარმეთა რაოდენობა, რომლებსაც ახალი სალარო აპარატი არ აუღიათ, ძალიან მცირეა ამიტომ, შემოსავლების სამსახურის გადაწყვეტილებით, დარეგისტრირების ვადა აღარ გადაიწევს.
ვითარებიდან გამომდინარე, შემოსავლების სამსახურის ინიციატივით, სერვის ცენტრები მთელი საქართველოს მასშტაბით, შაბათ - კვირასაც იმუშავებენ. თუმცა, ამ დღეებში მხოლოდ სალარო აპარატების გაცემა იქნება შესაძლებელი.
იმ მეწარმეებს, რომლებიც ჩააბარებენ განაცხადს და გადახდის ქვითარს აიღებენ პირველ თებერვლამდე, ახალი სალარო აპარატის აღებამდე, შეუძლიათ ისარგებლონ ძველი მოდელის აპარატით. სხვა შემთხვევაში, პირველი თებერვლიდან ძველი სალარო აპარატის გამოყენება იკრძალება.
ახალი მოდელის საკონტროლო სალარო აპარატების დარიგება აგვისტოდან დაიწყო. საგადასახადო კოდექსში შესული ცვლილებების შედეგად, გადამხდელთა ერთი ნაწილი საერთოდ თავისუფლდება სალარო აპარატის ქონის ვალდებულებისაგან. საქმე ეხება მიკრო ბიზნესის სტატუსის მქონე გადამხდელებს. მიკრო ბიზნესის სტატუსი მინიჭებული აქვს 18 599 გადასახადის გადამხდელს.
მეწარმეთა დიდ ნაწილს კი შემოსავლების სამსახურის გადაწყვეტილებით, ახალი აპარატები უსასყიდლოდ გადაეცემა. GPRS სალარო აპარატები უფასოდ ურიგდებათ მცირე ბიზნესის სტატუსის მქონე გადამხდელებს. ამ სტატუსის მქონე 10 758 მეწარმეს თანხის გადახდის გარეშე უკვე გადაეცა ახალი სალარო აპარატი.
GPRS სისტემის საკონტროლო - სალარო აპარატის ღირებულება 290 ლარია. ნებისმიერ გადამხდელს შეუძლია ისარგებლოს ბანკის განვადებით და შეიძინოს სალარო აპარატი. განვადება უპროცენტოა და თანხის გადახდა ნაწილდება 12 თვეზე.
