ბიძინა ივანიშვილი საჩხერეში 13 იანვარს საახალწლო კონცერტის დროს მომხდარ ინციდენტს ეხმიანება. როგორც "ჯი-ეიჩ-ენს" ივანიშვილის პრესსამდივნოდან აცნობეს, ივანიშვილისთვის აღმაშფოთებელია სამართალდამცველი სტრუქტურების უკანონო მოქმედება და პირდაპირი ძალადობა.
"ამას, ბუნებრივია, მოჰყვება ჩვენი მხრიდან შესაბამისი და ადეკვატური რეაგირება კანონის ფარგლებში. ამავე დროს აღვნიშნავთ, რომ ამჟამად მიმდინარეობს პოლიტიკური კოალიცია "ქართული ოცნების~ ორგანიზაციული და სტრუქტურული ჩამოყალიბების პროცესი, რომელიც უახლოეს ხანში მთელი საქართველოს მასშტაბით ამოქმედდება. Aამის შემდეგ შესაძლებელი გახდება ყველა ჩვენი მხარდამჭერის და თითოეული დაჩაგრული ადამიანის გაცილებით ეფექტიანი და ქმედითი დაცვა პოლიტიკური რეპრესიებისგან. მანამდე კი, თხოვნით მივმართავთ ყველას, ვისთვისაც მნიშვნელოვანია მშვიდობიანად, არჩევნების გზით წარმატების მიღწევა: გამოიჩინონ სიმშვიდე, მაქსიმალურად შეიკავონ თავი და არ აჰყვნენ შესაძლო პროვოკაციებს", - აცხადებს ივანიშვილი.
ის მიმართავს სამართალდაცვის ორგანოების წარმომადგენლებს, "პატივი სცენ საკუთარ პროფესიულ მოვალეობას, ხელი აიღონ უკანონო ბრძანებების შესრულებაზე და თავიანთი მოქმედებით ნუ გამოვლენ კონსტიტუციის ჩარჩოებიდან".
ივანიშვილის მტკიცებით, ძალიან მალე დადგება დრო, როდესაც ყველა პასუხს აგებს არა რომელიმე პოლიტიკური ძალის, არამედ კანონის წინაშე, არა რომელიმე პოლიტიკურ ლიდერთან, არამედ თავისუფალ სასამართლოში.
"ნუ აჰყვებით საგანგებოდ გავრცელებულ ჭორებს, თითქოს ხელისუფლების შეცვლის შემთხვევაში თქვენ პოლიტიკური რეპრესიების ქვეშ მოჰყვებით. პირიქით, ჩვენ ხელისუფლების არჩევნებით შეცვლას იმიტომაც ვაპირებთ, რომ სამართალდაცვის სტრუქტურები გათავისუფლდნენ პოლიტიკური წნეხისგან და არ მოუწიოთ პოლიტიკურად მოტივირებული უკანონო ბრძანებების შესრულება. ჩვენ ყველამ უნდა ვიცხოვროთ ისეთ ქვეყანაში, რომელიც კანონებით იმართება და არა პოლიტიკური ლიდერების ნება-სურვილით", - განაცხადა ივანიშვილმა.
