"საქართველოს ძველ ეპოქაში ვერავინ დააბრუნებს, რადგან ქართული საზოგადოება არ არის ცხენი, რომელსაც ლაგამო უნდა ამოსდო და თავი მიატრიალებინო უკან", - ამის შესახებ საქართველოს პრეზიდენტმა მიხეილ სააკაშვილმა მარნეულში, ხალხთან შეხვედრისას განაცხადა. მისი თქმით, "თუ საქართველოს უკან დაბრუნებას ვინმე მოინდომებს, იმ მხედარს ჩამოაგდებს ასეთი ცხენი".
"ძალიან ბევრი დრო დავკარგეთ და ვინც რა უნდა ილაპარაკოს, აღარ დავბრუნდებით ძველ წყობაში. ძველი წყობა ასოცირებული იყო სიღარიბესთან, უთანასწორობასთან, მოსყიდვასთან და ფულის წართმევასთან. ჩვენ გვჭირდება უკეთესი ცხოვრება და ყველანი ერთად გავაკეთებთ ამას. ყველაფერს ვაკეთებთ თქვენთვის და სულ არ მაინტერესებს, რას იტყვის რომელიმე ცხვირაწეული ადამიანი, უფრო ცნობილი ადამიანი ან უცხოეთი. თუმცა, ჩვენს ქვეყანას დიდი ავტორიტეტი აქვს და ეს იმის გამო, რომ მთავრობა ფიქრობს ხალხზე, ემსახურება ხალხს, მოსპო კორუფცია. ყველა საჯარო მოხელე ყოველდღიურად ფიქრობს იმაზე, თუ რა გაუკეთა მან საკუთარ ხალხს", - განაცხადა საქართველოს პრეზიდენტმა.
მისი თქმით, შენობები საქართველოში "იმაზე მაგარი უნდა იყოს, ვიდრე ჰოლანდიაში, ამერიკაში ან გრენლანდიაშია".
"ჩვენ ვართ საზოგადოება რომელიც მიდის წინ. მე არა მხოლოდ ამ საავადმყოფოს ვათვალიერებ აქ, არამედ დღეს ვხსნით ახალ დიდ სუპერმარკეტს მთავარ მოედანზე. ასევე ვხსნით პოლიციის შენობას. შენდება იუსტიციის სახლი. მარნეული ერთ-ერთი ულამაზესი ადგილი ხდება ახალ საქართველოში. ეს მოიტანა ვარდების რევოლუციამ, ჩვენმა ერთობლივმა შრომამ. საქართველოში არ არსებობს მეორეხარისხოვანი ხალხი, მეორეხარისხოვანი ადგილები. საქართველოში ყველა ადგილი არის თანასწორი, ყველა ეთნიკური ჯგუფი არის თანასწორი, ყველა აღმსარებლობის წარმომადგენელი არის თანასწორი, რადგან ჩვენ ერთად ვქმნით ახალ ქვეყანას", - განაცხადა სააკაშვილმა.