ცესკოს თავმჯდომარემ პრეზიდენტს მადლობა გადაუხადა შეხვედრის ინიცირებისთვის, „ჩემთვის, როგორც ცესკო-ს თავმჯდომარისათვის, მნიშვნელოვანია თქვენი, როგორც ქვეყნის პრეზიდენტისა და მმართველი პარტიის ლიდერის მოსაზრებები. მე მუდმივად ვხვდები საარჩევნო პროცესში ჩართულ ყველა მხარეს, პოლიტიკური პარტიის ლიდერებს, არასამთავრობო და საერთაშორისო ორგანიზაციების, ასევე მედიის წარმომადგენლებს თბილისსა და რეგიონებში, ვესაუბრები საარჩევნო ადმინისტრაციის გეგმებზე, ვისმენ მათ მოსაზრებებსა და შენიშვნებს ჩვენ საქმიანობაში მათი გათვალისწინების მიზნით," აღნიშნა შეხევედრაზე ზურაბ ხარატიშვილმა.

ცესკო-ს თავმჯდომარემ პრეზიდენტს საარჩევნო ადმინისტრაციის სტრატეგია გააცნო, რომელიც 2011-2014 წლებს და შესაბამისად 4 არჩევნებს მოიცავს - მიმდინარე წელს საქართველოს პარლამენტისა და აჭარის უმაღლესი საბჭოს არჩევნებია დაგეგმილი, 2013 წელს - საპრეზიდენტო, 2014 წელს კი ადგილობრივი თვითმმართველობის.

„ჩვენი სტრატეგიული მიზანია, რომ ქართული საზოგადოების მხრიდან მოვიპოვოთ სრული ნდობა საარჩევნო პროცესისა და მისი შედეგებისადმი. ამ მიზნით ჩვენ ვფიქრობთ შევასრულოთ დამოუკიდებელი არბიტრის ფუნქცია, ხოლო საარჩევნო პროცესში მონაწილე ყველა მხარემ ერთობლივად ვუპასუხოთ ორ მთავარ გამოწვევას - ერთი, რომ ყველა სუბიექტს ჰქონდეს თანაბარი პირობები და მეორე - საარჩევნო სუბიექტებმა დაიცვან კანონი, დაიცვან ეთიკის ნორმები, ასევე ადმინისტრაციული რესურსების გამოყენებისა და ამომრჩეველთა მოსყიდვის მცდელობით ჩრდილი არ მიაყენონ არჩევნების შედეგებს," აღნიშნა ცესკოს თავმჯდომარემ პრეზიდენტთან საუბრისას. საარჩევნო ადმინისტრაციის ხელმძღვანელმა მიხეილ სააკაშვილთან დიალოგში, ასევე ხაზგასმით განაცხადა, რომ აღნიშნული მიმართულებით ყველა დაინტერესებული მხარის ერთობლივი ძალისხმევა, შესაძლებელს გახდის ჩატარდეს არჩევნები, რომელიც სრულ შესაბამისობაში იქნება როგორც ქართული საზოგადოების, ისე ეუთოსა და ქვეყნის საერთაშორისო თანამეგობრობის მოთხოვნებთან.

როგორც საქართველოს პრეზიდენტმა შეხვედრისას განაცხადა, კანონის თანახმად, საპარლამენტო არჩევნები ოქტომბერში გაიმართება და დარჩენილი 9 თვე საკმარისი დროა იმისათვის, რომ ცესკო სათანადოდ მოემზადოს. „...9 თვე რჩება ამ არჩევნებამდე, 9 თვე არის საკმარისი დრო, რომ ყველა ჩავრთოთ, გრძელვადიანი მონიტორინგები გავაკეთოთ, ყველა პარტია სათანადოდ მოემზადოს, ყველამ წარმოადგინოს თავისი პროგრამა, ამ შემთხვევაში მე არ ვლაპარაკობ, როგორც ნაციონალური მოძრაობის ლიდერი, მე მაინტერესებს როგორც პრეზიდენტს, რომ ეს არჩევნები ჩატარდეს სუფთად," განაცხადა საქართველოს პრეზიდენტმა.

რაც შეეხება, ფინანსურ მხარეს, მიხეილ სააკაშვილის განცხადებით, სახელმწიფო საჭირო რესურსებს გამოყოფს, იმისათვის, რომ საარჩევნო პროცესები სამართლიანად და დემოკრატიულად წარიმართოს.

თავის მხრივ, ცესკოს თავმჯდომარემ აღნიშნა, რომ მისასალმებელია ქართული სახელმწიფოს მზაობა, - მოახდინოს რესურსების მობილიზება ისეთი მნიშვნელოვანი საქმისთვის, როგორიც არჩევნებია, „მე ვფიქრობ, რომ როგორც დროის თვალსაზრისით ისე ფინანსური და ადამიანური რესურსების კუთხით, ჩვენ მზად ვართ ჩავატაროთ არჩევნები, რომელსაც იმსახურებს ქართული საზოგადოება," განაცხადა ზურაბ ხარატიშვილმა.

შეხვედრის ბოლოს, საქართველოს პრეზიდენტმა ცესკოს თავმჯდომარეს და საარჩევნო ადმინისტრაციას გამჭვირვალედ მუშაობისთვის მადლობა გადაუხადა და დასძინა, რომ დიდი მნიშვნელობა აქვს, როცა ქვეყანაში იქმნება ინსტიტუტები, რომლებიც აღარ არიან დამოკიდებული ცალკეულ პირებზე.