2011 წლის 30 დეკემბერს, ძალაში შევიდა საკანონმდებლო ცვლილებები „მოქალაქეთა პოლიტიკური გაერთიანებების შესახებ" საქართველოს ორგანულ კანონში. კანონის შესაბამისად, საქართველოში რეგისტრირებული პოლიტიკური პარტიების ფინანსური საქმიანობის კანონიერებასა და გამჭვირვალობაზე მონიტორინგის განხორციელება საქართველოს კონტროლის პალატას დაევალა.

კანონით მონიჭებული მანდატის ფარგლებში, საქართველოს კონტროლის პალატა ეფექტიანი კომუნიკაციის მეთოდების საშუალებით მჭიდროდ თანამშრომლობს ყველა პოლიტიკურ პარტიასთან, რაც ინფორმაციის სწრაფად მიღებისა და ანალიზის პროცედურას მნიშვნელოვნად აადვილებს. ამის შესახებ ნათქვამია კონტროლის პალატის აღნიშნულთან დაკავშირებული გავრცელებულ ინფორმაციაში.

"„მოქალაქეთა პოლიტიკური გაერთიანებების შესახებ" საქართველოს ორგანულ კანონში დეტალურად არის გაწერილი ის ვალდებულებები, რომელთა შესრულებაც პოლიტიკურ პარტიებს ევალებათ. ყველა ქმედება, რომელიც კანონის რეგულაციათა გვერდის ავლით განხორციელდება, საქართველოს კანონმდებლობით გათვალისწინებულ პასუხისმგებლობას გამოიწვევს. ამდენად, ინფორმაციის გაცვლის ეფექტიანად განხორციელების უზრუნველსაყოფად, საქართველოს კონტროლის პალატა ვებ-გვერდზე განათავსებს და პერიოდულად განაახლებს მოქალაქეთა პოლიტიკური გაერთიანებებისათვის საინტერესო დეტალურ ინფორმაციას. ასევე, შეიმუშავებს ინფორმაციის მიღების ფორმებს ცხრილების სახით, რაც ემსახურება პოლიტიკური პარტიების მიერ კანონით სავალდებულო ინფორმაციის მოწოდების გაადვილებას", - იუწყება კონტროლის პალატა.

ასევე, შესაძლებელია, ნებისმიერი სახის შეკითხვა, რომელიც „მოქალაქეთა პოლიტიკური გაერთიანებების შესახებ" საქართველოს ორგანული კანონით რეგულირებულ საკითხებს შეეხება, გააგზავნონ მისამართზე: info_cpu@control.ge.

კონტროლის პალატის ინფორმაციით,"მოქალაქეთა პოლიტიკური გაერთიანებების შესახებ" საქართველოს ორგანული კანონის შესაბამისად, შემოწირულობების შესახებ ინფორმაცია პარტიამ სამი დღის ვადაში უნდა წარუდგინოს საქართველოს კონტროლის პალატას.

"თუ შემოწირულობის მიღებით ირღვევა ამ კანონით დადგენილი მოთხოვნები, პარტია ვალდებულია, თანხა თავის საბანკო ანგარიშზე ჩარიცხვიდან 3 დღის ვადაში დაუბრუნოს შემომწირველს, წინააღმდეგ შემთხვევაში თანხა სახელმწიფო ბიუჯეტში გადაირიცხება. კანონის აღნიშნული მოთხოვნის საფუძველზე, საქართველოს კონტროლის პალატის მიერ შემუშავებულ იქნა ანგარიშგების ფორმა N1, რომელიც განთავსებულია ქვემოთ ბმულის სახით. პოლიტიკური პარტიის მიერ ინფორმაცია ნებისმიერი სახის შემოწირულობის მიღების შესახებ, სწორედ ამ ფორმის მიხედვით უნდა შეივსოს და გადმოგზავნილ იქნას ელექტრონული სახით საქართველოს კონტროლის პალატის მიერ სპეციალურად ამ ტიპის ინფორმაციის მისაღებად განკუთვნილ მისამართზე - cpu@control.ge. საქართველოს კონტროლის პალატაში აღნიშნული ინფორმაციის მიღებისთანავე თქვენ გამოგეგზავნებათ ავტომატური ელექტრონული დასტური, იმის თაობაზე, რომ თქვენს მიერ შევსებული ფორმა მიღებულია წარმატებით. იმ შემთხვევაში თუ არ მიიღებთ დროულ ელექტრონულ დადასტურებას, დაგვიკავშირდით კონტროლის პალატის ცხელ ხაზზე - 832 243 81 53", - აღნიშნულია კონტროლის პალატის ინფორმაციაში.

ამასთან, კონტროლის პალა, პოლიტიკურ პარტიებს სთხოვს აცნობონ პასუხისმგებელი საკონტაქტო პირის მონაცემები წერილობითი ფორმით დადასტურებული პარტიის თავმჯდომარის ხელმოწერით.

"გთხოვთ ამავე ფორმით გვაცნობოთ იმ ელექტრონული ფოსტის მისამართი, საიდანაც რეგულარულად მოხდება კონტროლის პალატის მიერ დადგენილი ფორმების შევსებული სახით მოწოდება. საქართველოს კონტროლის პალატის მიერ ოფიციალურ ინფორმაციად მიიჩნევა პოლიტიკური პარტიების მიერ მხოლოდ წინასწარ განსაზღვრული საფოსტო მისამართიდან მიღებული ინფორმაცია. ამასთან, ელექტრონული ფორმით ინფორმაციის მოწოდების პარალელურად, პარტიის პასუხისმგებელი პირის ხელმოწერით დადასტურებული ცხრილების დედნები უნდა ჩაბარდეს საქართველოს კონტროლის პალატის კანცელარიას. ანალოგიური წესით ბარდება წლიური დეკლარაციის ფორმებიც", - აცხადებს კონტროლის პალატა.

ზემოთ აღნიშნული ფორმა N1-ში გაერთიანებულია სამი სახის ცხრილი:

ცხრილი N1 - ეხება პოლიტიკური პარტიების ანგარიშებზე ფიზიკური პირების მიერ განხორციელებულ შემოწირულობებს;

ცხრილი N2 - ეხება პოლიტიკური პარტიებისათვის ფიზიკური პირების მიერ განხორციელებულ არაფულად შემოწირულობებს, მათ შორის პარტიების მიერ შეღავათიანი პირობებით მიღებულ ყველა სახის მატერიალურ ფასეულობას და მომსახურებას;

ცხრილი N3 - ეხება კომერციული ბანკებისაგან მიღებულ კრედიტს, რომელიც საბაზრო საპროცენტო განაკვეთთან შედარების საფუძველზე შესაძლოა მიჩნეულ იქნას შეღავათიანი პირობებით მიღებულ სესხად, რაც კანონის შესაბამისად ითვლება შემოწირულობად (იგულისხმება საარჩევნო პერიოდი);

კონტროლის პალატის ინფორმაციით, კანონით გათვალისწინებული მოთხოვნის საფუძველზე, საქართველოს კონტროლის პალატამ ასევე შეიმუშავა პოლიტიკური პარტიების მიერ წარსადგენი წლიური საფინანსო დეკლარაციის ფორმების პროექტი. სადაც უნდა იქნას წარმოდგენილი ანგარიში პარტიის წლიური შემოსავლის, გასავლის და ქონებრივი მდგომარეობის შესახებ, რაც გულისხმობს პოლიტიკური პარტიების მიერ მათი საფინანსო საქმიანობის შესახებ ნებისმიერი ინფორმაციის მოწოდების ვალდებულებას.

ისევ და ისევ, ინფორმაციის წარდგენის გამარტივების მიზნით, პოლიტიკური პარტიების მიერ წლის განმავლობაში განხორციელებული საფინანსო საქმიანობის შესახებ წარსადგენი ინფორმაცია დაყოფილია რამოდენიმე ფორმად:

ფორმა N1 - გამონაკლისის სახით, ფორმა N1-ის ნაცვლად 2012 წლის 1 თებერვლამდე ჩასაბარებელ ფინანსურ დეკლარაციაში, რომელსაც თან უნდა ახლდეს აუდიტორის (აუდიტორული კომპანიის) დასკვნა ივსება ფორმა N11. ზემოთ აღნიშნული დეკლარაცია მოიცავს 2011 წლის 1 იანვრიდან 2012 წლის 1 იანვრამდე საანგარიშგებო პერიოდს.

ფორმა N2 - ეხება პოლიტიკური პარტიების მიერ მიღებულ შემოსავლებს საარჩევნო კამპანიის ფონდის გარდა;

ფორმა N3 - ეხება საარჩევნო კამპანიის ფონდისაგან მიღებულ შემოსავლებს;

ფორმა N4 - ასახავს პოლიტიკური პარტიების მიერ გაწეულ ხარჯებს გარდა საარჩევნო კამპანიის ფონდისაგან და საარჩევნო სისტემების განვითარების, რეფორმებისა და სწავლების ცენტრისაგან მიღებული შემოსავლების ხარჯვისა;

ფორმა N5 - ეხება საარჩევნო კამპანიის ფონდისაგან მიღებული შემოსავლების ხარჯვას;

ფორმა N6 - ეხება საარჩევნო სისტემების განვითარების, რეფორმებისა და სწავლების ცენტრისაგან მიღებული შემოსავლების ხარჯვას;

ფორმა N7 - წარმოადგენს პოლიტიკური პარტიების საბალანსო ანგარიშგებას;

ფორმა N8 - მოიცავს ინფორმაციას პოლიტიკური პარტიების საბანკო ანგარიშებზე სააღრიცხვო პერიოდის დასაწყისში და ბოლოს არსებული ნაშთების და ამ ანგარიშებზე განხორციელებული ჯამური მოძრაობების შესახებ;

ფორმა N9 - მოიცავს დეტალურ ინფორმაციას პოლიტიკური პარტიების სალაროში საანგარიშგებო წლის განმავობაში განხორციელებულ მოძრაობის შესახებ;

ფორმა N10 - ეხება პოლიტიკური პარტიის საკუთრებაში არსებულ არაფინანსური აქტივების მოძრაობას;

ფორმა N10.1 - ეხება პოლიტიკური პარტიის საკუთრებაში არსებული შენობა-ნაგებობების შესახებ ინფორმაციას;

ფორმა N10.2 - ეხება პოლიტიკური პარტიის საკუთრებაში არსებული სატრანსპორტო საშუალებების შესახებ ინფორმაციას;

ფორმა N11 - ეხება პოლიტიკური პარტიების მიერ მიღებულ შემოწირულებებს და საწევრო შენატანებს და ივსება მხოლოდ 2011 წლის შესახებ

"ამასთანავე გაცნობებთ, რომ წლიური საფინანსო დეკლარაციის ფორმები წარმოდგენილია პროექტის სახით და შესაბამისად არ არის საბოლოო ვარიანტი. საქართველოს კონტროლის პალატა მზად არის განიხილოს პოლიტიკური პარტიების წარმომადგენელთა მოსაზრებები ანგარიშგების შემუშავებულ ფორმებთან დაკავშირებით. გაცნობებთ, რომ საქართველოს კონტროლის პალატის ვებგვერდზე www.control.ge უკვე განთავსებულია ყოველწლიური „ფინანსური დეკლარაციის" პროექტი, რადგან აღნიშნული დეკლარაციის წარდგენის ვალდებულება პოლიტიკურ პარტიებს 2012 წლის 1 თებერვლამდე აქვთ, შენიშვნების ან კითხვების არსებობის შემთხვევაში, გთხოვთ, შეძლებისდაგვარად მოკლე ვადაში მოგვმართოთ. ამასთან, შეგიძლიათ დაგვიკავშირდეთ ზემოაღნიშნული ელექტრონული მისამართებისა და საქართველოს კონტროლის პალატის ცხელი ხაზის მეშვეობით", - იუწყება კონტროლის პალატა.