"საქართველოს ტერიტორიების დეოკუპაციის წარმატებით განსახორციელებლად საერთაშორისო თანამეგობრობის უფრო აქტიური მონაწილეობაა საჭირო", - ამის შესახებ ნათქვამია განახლებული "ეროვნული უსაფრთხოების კონცეფციაში".
კერძოდ, კი დოკუმენტში აღნიშნულია, რომ აუცილებელია ზემოქმედება რუსეთზე, რათა მან აიღოს საქართველოზე ძალის არგამოყენების ვალდებულება, დაიცვას საერთაშორისო სამართლის ნორმები, მათ შორის, სუვერენული ქვეყნის თანხმობის გარეშე, მის ტერიტორიაზე უცხო ქვეყნის შეიარაღებული ძალების განლაგების დაუშვებლობის პრინციპი და შეასრულოს ევროკავშირის შუამავლობით დადებული 2008 წლის 12 აგვისტოს რუსეთ-საქართველოს შორის ცეცხლის შეწყვეტის შესახებ შეთანხმებით ნაკისრი უკლებლივ ყველა ვალდებულება.
"პირველ რიგში, გაიყვანოს მისი შეიარაღებული ძალები ოკუპირებული ტერიტორიებიდან", - აღნიშნულია სტრატეგიაში.
ამასთან, საქართველოს ხელისუფლებას სიტუაციის განმუხტვის ერთადერთ საშუალებად მიაჩნია ისეთი სამშვიდობო მექანიზმის შექმნა, რომელიც უზრუნველყოფს ოკუპირებული ტერიტორიებიდან რუსეთის ფედერაციის შეიარაღებული ძალების გაყვანას და იქ საერთაშორისო სამშვიდობო/საპოლიციო ძალების განლაგებას.
"საქართველოსთვის მნიშვნელოვანია ევროკავშირის სადამკვირვებლო მისიის
საქმიანობა და მიაჩნია, რომ მან უნდა მოიცვას ოკუპირებული ტერიტორიებიც,
როგორც ეს მისი მანდატითაა განსაზღვრული. აღნიშნული ხელს შეუწყობს სრულყოფილი სამშვიდობო პროცესის დაწყებას და გრძელვადიანი მშვიდობის დამყარებას. რუსეთ-საქართველოს კონფლიქტის მოგვარება დადებითად იმოქმედებს მეზობელ ქვეყნებში არსებული კონფლიქტების დარეგულირებაზე. მნიშვნელოვანია საერთაშორისო საზოგადოების მიერ საქართველოს ოკუპირებული ტერიტორიების არაღიარების პოლიტიკის გაგრძელება და ამ ტერიტორიებზე ეთნიკური წმენდის და ეთნიკურ ნიადაგზე დევნის ფაქტის აღიარება", - ნათქვამია დოკუმენტში.
