საქართველოს უსაფრთოებისთვის სომხეთსა და აზერბაიჯანს შორის არსებული კონფლიქტი გამოწვევად რჩება. როგორც განახლებულ "ეროვნული უსაფრთხოების კონცეფციაშია" აღნიშნული, მეზობელი ქვეყნებიდან საქართველოს ტერიტორიაზე კონფლიქტების შესაძლო გადმოდინება საქართველოს წინაშე მდგარი საფრთხეა.
"კავკასიაში არსებული კონფლიქტები უარყოფითად მოქმედებს ამ რეგიონის უსაფრთხოებასა და ჰუმანიტარული კრიზისების განვითარების პოტენციური წყაროა. ამასთან, რუსეთის ფედერაცია ცდილობს საქართველოს წინააღმდეგ განაწყოს რუსეთის ფედერაციის ჩრდილოეთ კავკასიის რეგიონის მოსახლეობა", - აღნიშნულია დოკუმენტში.
ამასთან, აფხაზეთისა და ცხინვალის რეგიონის მონაკვეთებზე რუსეთის ფედერაციასთან საქართველოს სახელმწიფო საზღვრის კონტროლის არარსებობა ხელსაყრელ გარემოს ქმნის ტრანსნაციონალური დანაშაულის განვითარებისთვის და დამატებითი ხელისშემშლელი ფაქტორია აღნიშნულ პრობლემასთან ეფექტიანად გამკლავებისათვის.
"ასევე, გამოწვევაა სომხეთს და აზერბაიჯანს შორის არსებული კონფლიქტი. ამ ქვეყნებს შორის შეიარაღებული დაპირისპირების განახლება შეასუსტებს სამხრეთ კავკასიის სამივე ქვეყნის უსაფრთხოებას და ხელს შეუწყობს რუსეთის ფედერაციის პოლიტიკური გავლენის ზრდას მთელ რეგიონში", - ნათქვამია დოკუმენტში.