საქართველოსთვის რუსეთის მხრიდან ახალი სამხედრო აგრესია პოტენციურ რისკად რჩება.
ამის შესახებ ნათქვამია განახლებული "საქართველოს ეროვნული უსაფრთოების კონცეფციაში".
ქვეთავში "რუსეთის ფედერაციის მხრიდან ახალი სამხედრო აგრესიის რისკი" აღნიშნულია, რომ 2008 წლის აგვისტოში რუსეთის ფედერაციის სამხედრო აგრესიის საბოლოო მიზანი იყო არა მხოლოდ საქართველოს ტერიტორიების ოკუპაცია ან/და მარიონეტული რეჟიმების საერთაშორისო აღიარება, არამედ, ქვეყნის საგარეო პოლიტიკური კურსის შეცვლა ან/და დემოკრატიულად არჩეული ხელისუფლების ძალადობრივი გზით ჩანაცვლება, რადგან დამოუკიდებელი და დემოკრატიული საქართველო რუსეთის ფედერაციის მმართველი პოლიტიკური ელიტის მიერ მნიშვნელოვან საფრთხედ აღიქმება.
დოკუმენტში აღნიშნულია, რომ საქართველოს ოკუპირებულ ტერიტორიებზე რუსეთის შეიარაღებული ძალების ყოფნა, სამხედრო ბაზების მშენებლობა და მათი პოტენციალის ზრდა პროვოკაციებისა და შესაძლო მორიგი სამხედრო აგრესიისთვის პლაცდარმს წარმოადგენს.
ამასთან, რუსეთის ფედერაცია არღვევს საერთაშორისო სამართლის ფუნდამენტურ ნორმებს, არ ასრულებს 2008 წლის 12 აგვისტოს რუსეთ-საქართველოს შორის ცეცხლის შეწყვეტის შესახებ შეთანხმებას და არ იღებს საქართველოზე თავდაუსხმელობის ვალდებულებას.
რუსეთის ფედერაციამ 2008 წლის აგრესიის შემდეგ დაბლოკა გაეროს და ეუთოს მისიების მუშაობა, ევროკავშირის სადამკვირვებლო მისიას არ აძლევს საშუალებას, განახორციელოს მისი მანდატი ოკუპირებულ ტერიტორიებზე და ეწინააღმდეგება საერთაშორისო სამშვიდობო/საპოლიციო მექანიზმის შექმნის იდეას.
"ყოველივე ზემოაღნიშნულიდან გამომდინარე, არსებობს ახალი რუსული აგრესიის პოტენციური რისკი. თუმცა საქართველოსადმი გამოხატული საერთაშორისო მხარდაჭერა, მათ შორის ევროკავშირის სადამკვირვებლო მისიის ყოფნა, ამ რისკის მნიშვნელოვანი შემაკავებელი ფაქტორია", - აღნიშნულია კონცეფციაში.