მმართველი პარტია "მოქალაქეთა პოლიტიკური გაერთიანებების" შესახებ კანონში რაიმე სახის ცვლილების შეტანას აშშ-ს საელჩოს გავლენით კატეგორიულად უარყოფს.
როგორც "ჯი-ეიჩ-ენს" "ნაციონალური მოძრაობის" პრესსამსახურიდან აცნობეს, კანონის მიღების შემდეგ მისი კორექტირება არ მომხდარა. რედაქციული კუთხით კი, მხოლოდ ის ჩასწორებები გახორციელდა, რაზეც შეთანხმება კანონპროექტის მესამე მოსმენის განხილვის დროს მოხდა.
"სრულიად ალოგიკურია იმაზე საუბარი, თითქოს პარლამენტის მიერ მიღებული კანონი აშშ-ს საელჩოს მიერ გაკეთებული განცხადების საფუძველზე ჩასწორდა. "მოქალაქეთა პოლიტიკური გაერთიანებების" შესახებ კანონში შეტანილი ცვლილებები და დამატებები გუშინ, 14:00 საათისთვის გამოქვეყნდა, მაშინ როცა აშშ-ს საელჩოს განცხადება 17:00 საათისათვის გაავრცელა", - აცხადებენ ნაციონალური მოძრაობის პრეს სამსახურში.
შეგახსენებთ, რომ "მოქალაქეთა პოლიტიკური გაერთიანებების შესახებ" კანონის მეორე მუხლი პარლამენტში მესამე მოსმენის დროს შემდეგი სახით მიიღეს: მოქალაქეთა პოლიტიკური გაერთიანებები და ამ კანონის 26/1 მუხლის პირველი პუნქტით განსაზღვრული სუბიექტები, რომელთაც დაფინანსება მიღებული აქვთ ამ კანონით დადგენილ რეგულაციათა დარღვევით და ამ კანონის ამოქმედების მომენტისთვის აღნიშნული თანხები არ დაუხარჯავთ, ვალდებულნი არიან ამ კანონის ამოქმედებიდან არაუგვიანეს 3 კალენდარული დღის ვადაში აღნიშნული თანხები დაუბრუნონ თანხის გამცემს. აღნიშნული ვალდებულების შეუსრულებლობის შემთხვევაში თანხა მიექცევა სახელმწიფოს საკუთრებაში.
"საკანონმდებლო მაცნეში" გამოქვეყნებულ კანონში კი მუხლი შესწორებულია და შემდეგნაირად არის ჩამოყალიბებული - მოქალაქეთა პოლიტიკური გაერთიანებები და ამ კანონის პირველი მუხლის მე-6 პუნქტით გათვალისწინებული 26/1 მუხლის პირველი პუნქტით განსაზღვრული პირები, რომელთაც დაფინანსება მიღებული აქვთ კანონით დადგენილ მოთხოვნათა დარღვევით და ეს თანხები ამ კანონის ამოქმედების მომენტისთვის არ დაუხარჯავთ, ვალდებული არიან აღნიშნული თანხები ამ კანონის ამოქმედებიდან არა უგვიანეს 3 კალენდარული დღისა დაუბრუნონ მათ გამცემს. ამ ვალდებულების შეუსრულებლობის შემთხვევაში თანხები მიექცევა სახელმწიფოს საკუთრებაში.