"დემოკრატიული მოძრაობა - ერთიანი საქართველოს" მთავარი საბჭო ეხმაურება ადამიანური რესურსების კონსულტირების, კვლევებისა და საგამოძიებო მომსახურების გლობალური კომპანიის Mercer-ის კვლევის შედეგებს, რომლის თანახმადაც ევროპის დედაქალაქებს შორის თბილისში ყველაზე დაბალი ცხოვრების დონეა.
"ეს შედეგები არის საგანგაშო და კატასტროფული ჩვენი ქვეყნისთვის და ნათლად ადასტურებს, რომ ხელისუფლების და პირადად პრეზიდენტის განცხადებები იმის შესახებ, რომ თბილისში განხორციელებულ პროექტებს მსოფლიოში ანალოგი არ აქვს, ხოლო უსაფრთხოების კუთხით თბილისი ევროპაში პირველ ადგილზე დგას, მხოლოდ შიდამოხმარების პიარსიცრუეს წარმოადგენს. რეალურად კი დასავლეთი საკმაოდ რეალისტურად აფასებს საქართველოში შექმნილ ვითარებას, ხოლო მითი იმის შესახებ, რომ თითქოსდა საქართველო ინვესტორებისთვის ოაზისს წარმოადგენს, თუნდაც ამ დასკვნის საფუძველზეც კი არასერიოზულად ჟღერს. საუბედუროდ მიხეილ სააკშვილმა შეძლო, რომ დღეს საქართველოს, როგორც შემდგარი სახელმწიფოს არსებობა მსოფლიოში სერიოზული ეჭვის ქვეშ დგას. სასურველი იქნებოდა მსგავსი კვლევების შედეგებს მეტი ყურადღებით მოეკიდოს ის საერთაშორისო ორგანიზაციები და დიპლომატთა გარკვეული კატეგორია, რომლებიც ყველანაირად ცდილობენ რომ საქართველო წარმატებულ და დემოკრატიულ ქვეყნად წარმოგვიჩინონ"_ ნათქვამია დემოკრატიული მოძრაობის მიერ გავრცელებულ განცხადებაში.
გარდა ამისა, Mercer-ის კვლევის თანახმადვე, მსოფლიოს 221 ქალაქიდან, ცხოვრების დონის მიხედვით თბილისი 214-ე ადგილზე გავიდა. ამავე კვლევის შედეგების მიხედვით, პირადი უსაფრთხოების თვალსაზრისით თბილისი ევროპაში კვლავ ბოლო _ 215 ადგილს იკავებს.