ფრაქცია "ერთობა სამართლიანობისთვის" თავმჯდომარე, "თავისუფალი დემოკრატების" წევრი გიორგი ცაგარეიშვილი ხელისუფლებისა და მთავარ პროკურატურისგან პატიმარ გიორგი ოქროპირიძის წამების ფაქტების გამოძიებას მოითხოვს.
როგორც ცაგარეიშვილმა დღეს, პარლამენტში გამართულ პრესკონფერენციაზე აღნიშნა, ციხის რესპუბლიკურ საავადმყოფოში 22 წლის პატიმარს, გიორგი ოქროპირიძეს დაწესებულების რეჟიმის სამსახურის უფროსი ალექსანდრე თოლორდაია და დაწესებულების უსაფრთხოების სამსახურის უფროსი გიორგი ავსაჯანიშვილი სისტემატურად აყენებენ ფიზიკურ და სიტყვიერ შეურაცხყოფას.
"თოლორდაია და ავსაჯანიშვილი პატიმარს, რომელსაც ჩ ჰეპატიტის გართულებული ფორმის გამო ციხის საავადმყოფოში გადაიყვანეს სცემენ გაშლილი ხელით და სველი პირსახოცით, რომ ჩალურჯეჯები არ დაეწყოს. ოქროპირიძემ მის მიმართ განხორციელებულ წამების გამო თვითდაზიანებაც მიიყენა, თუმცა მასთან მისული ექიმი უკან გააბრუნეს და უთხრეს, რომ კარგი იქნება ცოტა სისხლისგან თუ დაიცლებიო. ასევე მას ემუქრებიან მოკვლით და ეუბნებიან, რომ ამას მისი მხრიდან თვითმკვლელობად გაასაღებენ", - განაცხადა ცაგარეიშვილმა და აქვე დასძინა, რომ პატიმარმა მისი წამების შესახებ ჩვენება მოსამართლესაც წარუდგინა, თუმცა მას დამატებით 30-დღიანი ადმინისტრაციული სასჯელი შეუფარდეს.
ცაგარეიშვილის ინფორმაციით, ოქროპირიძის საქმე, რომელსაც 13 წლით თავისუფლების აღკვეთა აქვს მისჯილი სტრასბურგის სასამართლოშია გადაგზავნილი, საიდანაც შუალედური დასკვნა მოვიდა, სადაც წერია, რომ აუცილებელია პატიმარს შესაბამის მკურნალობა სასწრაფოდ ჩაუტარდეს, თუმცა რეკომენდაცია დღემდე შესრულებული არ არის.
"ოქროპირიძის საქმე არის კიდევ ერთი დადასტურება სააკაშვილის ფაშისტური სახისა ქალბატონ კალმახელიძესთან ერთად. ეს არის სახე დემოკრატიისა, რომელიც აღმოსავლეთ ევროპაში ისე კაშკაშებს, რომ ადამიანების სიცოცხლეს ფერფლავს", - დასძინა ოპოზიციონერმა დეპუტატმა.
დღესვე, ცაგარეიშვილმა მთავარ პროკურატურასა და ხელისუფლებას მიმართა და მოითხოვა სასჯელაღსრულების სისტემაში მყოფი "სადისტების" სისხლის სამართლის პასუხისგებაში მიცემა.