პარტიისთვის დაწესებული ფინანსური შეზღუდვები მასთან დაკავშირებულ ფიზიკურ და იურიდიული პირებსაც შეეხება. აღნიშნულთან დაკავშირებით ცვლილებები პარლამენტმა დღეს, რიგგარეშე სხდომაზე „მოქალაქეთა პოლიტიკური გაერთიანებების შესახებ" კანონში მესამე მოსმენით დაამტკიცა.
მიღებული გადაწყვეტილების თანახმად, პარტიისა და მასთან დაკავშირებული ფიზიკური და იურიდიული პირების მიერ წლის განმავლობაში მიღებული სახელმწიფო დაფინანსება, შემოწირულობებისა და სხვა კანონით დაშვებული ფორმით მიღებული შემოსავლის ჯამური რაოდენობა არ უნდა აღემატებოდეს საქართველოს წინა წლის მთლიანი შიდა პროდუქტის 0.2 %-ს, ხოლო ხარჯის საერთო ოდენობა არ უნდა აღემატებოდეს საქართველოს წინა წლის მთლიანი შიდა პროდუქტის 0.2%-ს.
ამასთან, პარტია ვალდებულია ზღვარს გადაჭარბებით მიღებული თანხები საბანკო ანგარიშზე ჩარიცხვიდან 3 დღის ვადაში დაუბრუნოს შემომწირველს. ვალდებულების შეუსრულებლობის შემთხვევაში კი თანხები გადაირიცხება სახელმწიფო ბიუჯეტში.
ამასთან, კანონში განმარტებულია, რომ პარტიის ქონებას ქმნის: საწევრო შენატანები; შემოწირულობები; კანონით დადგენილ შემთხვევებში - სახელმწიფოს მიერ გამოყოფილი თანხები; ასევე, პარტიის სიმბოლიკის დამზადებითა და გავრცელებით, პარტიის მიერ ლექციების, გამოფენებისა და სხვა მსგავსი ღონისძიებების მოწყობით, აგრეთვე საწესდებო მიზნებიდან გამომდინარე საგამომცემლო და სხვა საქმიანობიდან მიღებული თანხები, რომლებიც არ ცვლის პარტიის, როგორც არასამეწარმეო იურიდიული პირის, ხასიათს. აგრეთვე, საჯარო ღონისძიებების მეშვეობით მიღებული შემოწირულებები.
აღსანიშნავია, რომ ამ ქვეპუნქტის საფუძველზე მიღებული საერთო შემოსავლები არ უნდა აღემატებოდეს 60000 ლარს წლის განმავლობაში.