"რამდენიც არ უნდა დაგვიჯდეს, ყველა ადამიანს, ვისაც სჭირდება საქართველოში, კბილები უნდა გავუკეთოთ. შემდეგი თვიდან ყველა სოფელს, ყველა რაიონს მივყვებით", _ განაცხადა საქართველოს პრეზიდენტმა ჭიათურაში მრავალპროფილიანი საავადმყოფოს გახსნისას.
"კბილები ის კი არ არის, რომ მხოლოდ ლამაზი ღიმილი გქონდეს. კბილები როდესაც არა აქვს ადამიანს, მთელი მისი ჯანმრთელობა მიდის ჯანდაბაში. ამიტომ რამდენიც არ უნდა დაგვიჯდეს, ყველა ადამიანს, ვისაც ეს სჭირდება საქართველოში, კბილები უნდა გავუკეთოთ. შემდეგი თვიდან მივყვებით ყველა სოფელს, ყველა რაიონს. არავის არ უნდა ჰქონდეს ეს პრობლემა, რომ პირის გაღება ერიდებოდეს იმის გამო, რომ ფული არა აქვს", _ განაცხადა სააკაშვილმა.
შეგახსენებთ, რომ ჰოსპიტალური სექტორის განვითარების პროექტის ფარგლებში, ახალი მრავალპროფილიანი საავადმყოფო საქართველოს პრეზიდენტმა მიხეილ სააკაშვილმა ჭიათურაში გახსნა. უმაღლესი სტანდარტების შესაბამისი კლინიკა სადაზღვევო კომპანია "ირაომ" ააშენა, რისთვისაც 3 მილიონი ლარის ინვესტიცია განახორციელა. ადგილობრივებს აქ შეუძლიათ ამბულატორიული, თერაპიული, ქირურგიული, სამშობიარო და სხვა მომსახურების მიღება. ახალი ჰოსპიტალი, რომელიც ულტრათანამედროვე აპარატურითაა აღჭურვილი, 25-საწოლიანია და 120-მდე მაღალკვალიფიციური სპეციალისტია დასაქმებული.
