საპარლამენტო უმრავლესობა პარტიებისთვის ფინასური შეზღუდვების გამკაცრებაზე დეპუტატ კობა ხაბაზის ინიციატივასთან დაკავშირებით კონსულტაციებს გაივლის.
როგორც ჟურნალისტებს უმრავლესობის წევრმა აკაკი მინაშვილმა განუმარტა, პარტიების მიერ წელს მიღებული შემოსავალი მომავალი წლის შემოსავლისა და ხარჯვით ნაწილთან დაჯამდება და თუ თანხა მშპ-ის 0.2%-ს გადააჭარბებს, მაშინ პარტიას სანქციები დაუწესდება.
მინაშვილის თქმით, რა სახის სანქციები დაწესდება, ჯერ ჩამოყალიბებული არ არის და აღნიშნულ საკითხზე ინიციატივის ავტორთან კონსულტაციებს გაივლიან.
დღეს იურიდიულ საკითხთა კომიტეტის სხდომაზე "სისხლის სამართლის კოდექსში" პოლიტიკური პარტიების მიერ უკანონოდ მიღებულ შემოსავლებთან დაკავშირებით ხაბაზმა ახალი ინიციატივა გააჟღერა, კერძოდ, უმრავლესობის წევრის თქმით, კანონში აუცილებელია ჩაიწეროს, რომ პარტიებს, რომლებსაც თანხები უკვე მიღებული აქვთ და ცვლილებების შემდეგ ის უკანონოდ ჩაითვლება, ასეთ შემოსავლებთან დაკავშირებით კანონს უკუქმედების ძალა უნდა მიეცეს.
ხაბაზის განმარტებით, თუ კანონის ძალაში შესვლის დროს პარტიებს აღნიშნული თანხა უკვე გახარჯული ექნებათ, მათ აღარავინ მოედავებათ, მაგრამ თუ ფულს არჩევნებისთვის ინახავენ, ასეთ შემთხვევაში, მათ კონტროლის პალატას კანონის მიღებიდან ორი დღის შემდეგ ოფიციალური განაცხადით უნდა მიმართონ და მიღებული შემოსავალი გამცემს დაუბრუნონ, წინააღმდეგ შემთხვევში, დეპუტატი ინიციატივით გამოდის, თანხები სახელმწიფო ბიუჯეტის სასარგებლოდ მიიმართოს.
