სისხლის სამართლის კოდექსში პოლიტიკური პარტიების მიერ უკანონოდ მიღებულ შემოსავლებთან დაკავშირებით, შესაძლოა, ახალი ნორმა გაჩნდეს. როგორც დღეს იურიდიულ საკითხთა კომიტეტის სხდომაზე უმრავლესობის წევრმა კობა ხაბაზმა აღნიშნა, აუცილებელია ჩაიწეროს, რომ პარტიებს, რომლებსაც თანხები უკვე მიღებული აქვთ და ცვლილებების შემდეგ ის უკანონოდ ჩაითვლება, ასეთ შემოსავლებთან დაკავშირებით კანონს უკუქმედების ძალა მიეცეს.
ხაბაზის განმარტებით, თუ კანონის ძალაში შესვლის დროს პარტიებს აღნიშნული თანხა უკვე გახარჯული ექნებათ მათ არავინ აღარ მოედავებათ, მაგრამ თუ ფულს არჩევნებისთვის ინახავენ, ასეთ შემთხვევაში, მათ კონტროლის პალატას კანონის მიღებიდან ორი დღის შემდეგ ოფიციალური განაცხადით უნდა მიმართონ და მიღებული შემოსავალი გამცემს დაუბრუნონ, წინააღმდეგ შემთხვევში კი დეპუტატი ინიციატივით გამოდის თანხები სახელმწიფო ბიუჯეტის სასარგებლოდ მიიმართოს.
აღსანიშნავია, რომ თუ აღნიშნულ ინიციატივას უმრავლესობა გაითვალისწინებს, ოპოზიციის ნაწილისთვის მიმდინარე წლის ნოემბერ-დეკემბრის თვეში ბიძინა ივანიშვილთან ასოცირებული ორგანიზაციების მიერ გადარიცხული თანხები უკან უნდა დაუბრუნდეთ ორგანიზაციებს, წინააღმდეგ შემთხვევაში მათი სახელმწიფო ბიუჯეტში გადაქაჩვა მოხდება.
კომიტეტის სხდომაზე ხაბაზის ინიციატივას უმრავლესობის მხრიდან წინააღმდეგობა არ შეხვედრია და სავარაუდოდ იგი სისხლის სამართლის კოდექსში აისახება.