ფრაქცია "ერთობა სამართლიანობის" წევრმა ჯონდი ბაღათურიამ განათლების სისტემაში კორუფციის არსებობის შესახებ დოკუმენტები პარლამენტის თავმჯდომარეს დავით ბაქრაძეს გადასცა.
როგორც დღეს, პარლამენტის რიგგარეშე სხდომაზე ბაღათურიამ აღნიშნა, განათლების სფეროში ელიტარული კორუფციაა, რომელშიც სამინისტროს მაღალი თანამდებობის პირები და გუბერნატორები არიან ჩართულები.
ოპოზიციონერმა დეპუტატმა საჯარო სკოლების ოპტიმიზაციის შედეგებზე ისაუბრა და აღნიშნა, რომ სახელმწიფო სკოლების დახურვა მხოლოდ იმიტომ ხდება, რომ მოსწავლეების "გადაქაჩვა" კერძო სკოლებში მოხდეს, რომელებიც გუბერნატორების ოჯახის წევრების მიერ არის დაფუძნებული.
"პრაქტიკულად ჩვენი ბავშვების დიდ ნაწილს განათლების გარეშე ვტოვებთ, რომლებიც ქუჩაში რჩებიან იმის გამო, რომ მათ კერძო სკოლაში სწავლის საფასურის გადახდის საშუალება არ აქვს", - განაცხადა ბაღათურიამ და პარლამენტს აღნიშნულის შესახებ რეაგირებისკენ მოუწოდა.
ამასთან, ოპოზიციონერმა დეპუტატმა სტატისტიკური მონაცემები მოიყვანა, რომლის მიხედვითაც 2003-04 სასწავლო წელს 3175 საჯარო სკოლა იყო, ხოლო მათი რიცხვი 2010-11 წლებში 2130-მდე შემცირდა, რადგან ოპტიმიზაციის პროცესის დროს 1045 სკოლა დაიხურა.
ბაღათურიას თქმით, 2003-04 წლებში კერძო სკოლებში მოსწავლეთა რაოდენობა 16 900 იყო, ხოლო 2010 -11 წლებში 53 000-მდე გაიზარდა.
