"ქრისტიან-დემოკრატები" კულტურისა და სპორტის მოღვაწეების დასაფინანსებლად 2012 წლის სახელმწიფო ბიუჯეტიდან დაახლებით 12 მილიონ ლარამდე თანხის გამოყოფას ითხოვენ.
როგორც "ქრისტიან-დემოკრატების" წევრმა, ვიცე სპიკერმა ლევან ვეფხვაძემ განაცხადა, აღნიშნული თანხა იმ მეცნიერების, მსახიობების, მომღერლების, მუსიკოსებისა და სპორტსმენებისათვის უნდა გამოიყოს, რომლებსაც ბიძინა ივანიშვილის საქველმოქმედო ფონდი აფინანსებდა.
"მოქალაქეთა პოლიტიკური გაერთიანებების შესახებ ახალი საკანონმდებლო ცვლილებების შესაბამისად, პოლიტიკური პარტიებთან დაკავშირებული იურიდიული პირების მიერ გაწეული ქველმოქმედება ამომრჩეველთა მოსყიდვად ჩაითვლება. შესაბამისად, რამდენიმე ათასი ჩვენი თანამოქალაქე, საზოგადოების გამორჩეული ნაწილი: მეცნიერები, მსახიობები, მომღერლები, მუსიკოსები, სპორტსმენები ელემენტარული საარსებო საშუალებების გარეშე დარჩებიან", - აღნიშნა ვაფხვაძემ.
მისივე თქმით, ივანიშვილმა გადაწყვიტა, ოცნება 3-4 პოლიტიკური ლიდერისათვის აეხდინა და ამ სასიქადულო ხალხის ნაცვლად, მათ მომეტებულ პოლიტიკურ თუ პირად ამბიციებს აფინანსებს.
რაც შეეხება ხელისუფლების გადაწყვეტილებას, რომლის თანახმადაც იურიდიულ პირებს დაფინანსება ეკრძალებათ ვეფხვაძის შეფასებით, ეს არის იმპულსური, დაუფიქრებელი ნაბიჯი, რომელიც პოლიტიკური კონიუნქტურით არის ნაკარნახევი და 2012 წლის მილოცვის ნაცვლად, საზოგადოების მნიშვნელოვანი ნაწილის საშიმშილოდ გაწირვაა.
"ქრისტიან-დემოკრატები" მიმართავენ მთავრობასა და შესაბამის სამინისტროებს, რათა არ გაწირონ ხალხი, დათვალონ ხარჯები და ბიუჯეტში სათანადო ცვლილებები შეიტანონ.
მისივე ინფორმაციით, წელიწადში ამისთვის სახელმწიფოს 10-დან 12 მილიონ ლარამდე დაუჯდება.
"ჩვენ მზად ვართ, სამუშაო ჯგუფის მუშაობაში ჩავერთოთ, რათა არაერთი მეცნიერი, მსახიობი, მომღერალი, მუსიკოსი თუ სპორტსმენიო საარსებო წყაროს გარეშე არ დარჩეს", - განაცხადა ვიცე-სპიკერმა.
