საქართველოს პარლამენტის თავმჯდომარის დავით ბაქრაძის თქმით, პარტიების დაფინანსებასთან დაკავშირებული შეზღუდვების დაწესების მიზანს მისი საერთაშორისო ნორმებთან შესაბამისობაში მოყვანა იყო.
როგორც ბაქრაძემ "მოქალაქეთა პოლიტიკური გაერთიანებების შესახებ" კანონში შეტანილი ცვლილებების შეფასებისას აღნიშნა, ზაფხულში "გრეკოს" დელეგაცია იყო ჩამოსული, რომელთაც ქართველ კანონმდებლებს რეკომენდაციები მისცეს, რომ არ მოხდეს კანონმდებლობაში ისეთი ნიშების დარჩენა, რომლითაც შესაძლებელი გახდება ფულის არალეგალური გადარიცხვები და გათეთრება.
"კანონში ცვლილებების შეტანის ძირითადი მიზანი იყო საქართველოს კანონმდებლობის შესაბამისობაში მოყვანა საერთაშორისო, კონკრეტულად კი ევროსაბჭოს ნორმებთან. ამ კუთხით გრეკოს ექსპერტებს ჰქონდათ მთელი რიგი რეკომენდაციები, რომელზე დაყრდნობით არის მომზადებული კანონი, რომელმაც ექსპერტიზა ვენეციის კომისიაში, ევროსაბჭოსა და ეუთოს შესაბამის სტრუქტურებში გაიარა", - განაცხადა ბაქრაძემ.
რაც შეეხება ოპოზიციის შენიშვნებს აღნიშნულ ცვლილებებთან დაკავშირებით, პარლამენტის თავმჯდომარე მზადყოფნას გამოთქვამს ნებისმიერ შენიშვნის განხილვა მოხდეს.
"მზად ვართ ვისაუბროთ ნებისმიერ შენიშვნაზე ოპოზიციასთან და არასამათავრობოებთანაც. ამ კანონის მიღების ამოცანა ნამდვილად არ არის ვინმეს შეზღუდვა", - მიაჩნია ბაქრაძეს.
აღსანიშნავია, რომ "მოქალაქეთა პოლიტიკურ გაერთიანებების შესახებ" კანონში ცვლილებებს ახალი შეზღუდვა ვენეციის კომისიის დასკვნის შემდეგ დაემატა.
კერძოდ კი პირველი მოსმენის დროს გაჩნდა ნორმა, რომლის მიხედვითაც პოლიტიკური პარტიის მსგავსი ფინასური შეზღუდვები იმ პირებს და მათი ოჯახის წევრებსაც დაუწესდებათ, რომელთაც პოლიტიკური მიზნები გაცხადებული აქვთ.
