იურიდიულ საკითხთა კომიტეტის თავმჯდომარის, პავლე კუბლაშვილის შეფასებით, პარლამენტის წევრისთვის ცხოვრების ცენზის გაუქმება საგარეო ფაქტორების გათვალისწინებით შეუძლებელია. ამის შესახებ კუბლაშვილმა პარლამენტის რიგგარეშე სხდომაზე "საარჩევნო კოდექსში" შესატანი ცვლილებების განხილვისას აღნიშნა.
მისი თქმით, თავდაპირველად დეპუტატად არჩევისთვის ქვეყნაში ცხოვრების ცენზი 10 წელი იყო, მაგრამ ეს შემცირდა.
"ევროპულ ქვეყნებში ეს ცენზი 6 თვემდეა შემცირებული, მაგრამ ჩვენ ამას ვერ გავიზიარებთ, საგარეო პოლიტიკურ ფაქტორებიდან გამომდინარე", - აღნიშნა კუბლაშვილმა.
დეპუტატის შეფასებით, ამ მიმართულებით დიდი ნაბიჯების გადადგმა არსებული რეალობის გათვალისწინებით არასწორი იქნება.
"6-თვიანი ცენზის დაწესება ნიშნავს, რომ მას, ფაქტობრივად, ვაუქმებთ", - მიაჩნია კუბლაშვილს.
"სარჩევნო კოდექსის" პროექტის მიხედვით, პარლამენტის წევრად შეიძლება აირჩეს საარჩევნო უფლების მქონე საქართველოს მოქალაქე 25 წლის ასაკიდან, რომელსაც საქართველოში უცხოვრია 5 წელიწადს მაინც და არჩევნების დანიშვნის დღემდე ბოლო სამ წელიწადს.
