საქართველოს პარლამენტის თავმჯდომარის, დავით ბაქრაძის განცხადებით, რუსული აგრესიის რისკი საქართველოში დღეს მინიმალურია. ეს განცხადება პარლამენტის თავმჯდომარემ უსაფრთხოების ახალ კონცეფციასთან დაკავშირებით გააკეთა.
"რაც შეეხება უშუალოდ საფრთხეებს, პრინციპში, დოკუმენტი ძალიან კარგად და დეტალურად აღწერს ყველა იმ რეალურ თუ პოტენციურ საფრთხეს, რომელიც შეიძლება საქართველოს ემუქრებოდეს. ამ შემთხვევაში, ჩვენი როგორც ხელისუფლების ამოცანაა, ყველაფერი გავაკეთოთ, რომ არ მოხდეს ამ საფრთხეების რეალიზება. სახელმწიფო მთლიანად და ყველა სახელმწიფო უწყება მზად იყოს იმისთვის, რომ დაიცვას ჩვენი მოქალაქეების უსაფრთხოება და უზრუნველყოს ქართული სახელმწიფოს შეუფერხებელი განვითარება", _ აცხადებს ბაქრაძე.
მისი თქმით, იმის გათვალისწინებით, თუ რა შეფასება აქვს საერთაშორისო თანამეგობრობის მხრიდან რუსეთის 2008 წლის აგრესიას, რა მდგომარეობაშია დღეს საერთაშორისო მხარდაჭერის კუთხით საქართველო და იმის გათვალისწინებით, თუ რა ხდება თავად რუსეთის შიგნით, ბაქრაძე ფიქრობს, რომ დღეს განმეორებითი აგრესიის რისკი არის ძალიან მცირე.
