ქართული არასამთავრობო ორგანიზაციები კერძო ტელევიზიებისთვის წინასაარჩევნო პერიოდში უფასო პოლიტიკური რეკლამის გაშვების ვალდებულებას აპროტესტებენ. აღნიშნული საკითხი დღეს არასამთავრობოებმა საარჩევნო კოდექსის განხილვის დროს დააყენეს. არასამთავრობო ორგანიზაციების წარმომადგენელთა შეფასებით, კერძო ტელევიზიებისთვის უფასო რეკლამის გაშვების ვალდებულების დაკისრება კერძო საკუთრების ხელყოფაა. ისინი მოთხოვენ, რომ თუ ხელისუფლებას სურს, პოლიტიკურ პარტიებს ტელევიზიებში უფასო სარეკლამო დრო ჰქონდეს, ასეთ შემთხვევაში სახელმწიფომ შეისყიდოს სატელევიზიო დრო და შემდეგ გაუნაწილოს პოლიტიკურ პარტიებს.
აღნიშნულ საკითხთან დაკავშირებით საარჩევნო კოდექსში შესატანი ცვლილებების ერთ-ერთმა ინიციატორმა პავლე კუბლაშვილმა აღნიშნა, რომ საკითხი აღარ გადაიხედება და ისე დარჩება, როგორც აქამდე იყო.
