როგორც „ქრისტიან-დემოკრატების" ერთ-ერთმა ლიდერმა, ვიცე-სპიკერმა ლევან ვეფხვაძე განაცხადა, დღევანდელ კონსულტაციებზე მათი შეთავაზება იქნება 85 დეპუტატის არჩევა პროპორციული სიით და 65-ის მაჟორიტარულით მოხდეს.

"ვნახოთ რა შედეგით დასრულდება კონსულტაციები. თავიდან პარლამენტის დეპუტატების რიცხოვნობის გაზრდა ერთგავარი კომპრომისი იყო, რადგან ვენეციის კომისია მაჟორიტარული ოლქების დაყოფას ითხოვდა, შესაბამისად მაჟორიტარების რიცხვი 83-მდე იზრდებოდა", - აღნიშნა ვეფხვაძემ.

მისივე თქმით, 150 დეპუტატის დარჩენის შემთხვევაში პარტიებს პროპორციული სიით მხოლოდ 67 დეპუტატის შეყვანის საშუალება რჩებოდათ, რაც მიუღებელია.

„როგორც ჩანს დეპუტატთა რაოდენობის გაზრდა საბოლოოდ არც საზოგადოებაში არ იყო მხარდაჭერილი და ვერც ის პარტიები მიხვდნენ ამის მნიშვნელობას, რომელთათვისაც ეს ხდებოდა", - განაცხადა ვიცე-სპიკერმა.

შეგახსნებთ, რომ დღეს, 14:00 საათზე პარლამენტში, დავით ბაქრაძესთან დეპუტატთა რაოდენობის საკითხზე კონსულტაციები გაიმართება.