საქართველოს პრეზიდენტმა მიხეილ სააკაშვილმა ყვარლის სახლში სპორტის სხვადასხვა სახეობის წარმომადგენლები ბრწყინვალების საპრეზიდენტო ორდენით დააჯილდოვა.
ბრწყინვალების საპრეზიდენტო ორდენი საქართველოს კალათბურთის ფედერაციის პრეზიდენტ ბესიკ ლიპარტელიანს, ეროვნული საკალათბურთო ნაკრების მწვრთნელს იგორ კოკოშკოვს, საქართველოს რაგბის ფედერაციის პრეზიდენტს გიორგი ნიჟარაძეს და რაგბის ნაკრების ექს-თავკაცს ჯეიმს რიჩარდ დიქსონს ქართული სპორტის განვითარების საქმეში შეტანილი განსაკუთრებული წვლილისთვის და საერთაშორისო ასპარეზზე მიღწეული წარმატებისთვის გადაეცათ.
"პირველ რიგში მინდა ყველას მადლობა გითხრათ, რომ წელს გამოჩნდა თქვენი მრავალწლიანი მუშაობის ძალიან სერიოზული შედეგი. საქართველო ორივე სპორტის სახეობაში - რაგბშიც და კალათბურთშიც ბევრად უფრო წინ წავიდა და ეს არის ნაწილი საერთო პროცესის ჩვენს ქვეყანაში რაც მიდის, რომ ჩვენი ქვეყანა,მეორეხარისხოვანი ქვეყნიდან გადაიქცეს პირველხარისხოვან ქვეყნად", - განაცხადა პრეზიდენტმა და აღნიშნა, რომ სპორტს აქვს გადამწყვეტი მნიშვნელობა საქართველოსთვის.
მისი თქმით, მან პირადად იხილა ლიტვაში, თუ როგორ სახალხო ზეიმად გადაიქცა ევროპის ჩემპიონატზე საქართველოს საკალათბურთო ნაკრების გამოსვლა. პრეზიდენტის თქმით, ლონდონში ყოფნის დროს ბრიტანეთის პრემიერ-მინისტრი აღფრთოვანებით ელაპარაკა საქართველოს რაგბის ნაკრების თამაშზე.
"მან ისაუბრა საქართველოსა და ინგლისის გუნდების შეხვედრაზეც. მისთვის სურპრიზი იყო ჩვენი ასეთი თამაში და სერთოდ თქვენი თამაში ახალ ზელანდიაში იყო არა მხოლოდ რაგბში მნიშვნელოვანი ნაბიჯი, არამედ ეს უკვე აღარ იყო უთანოსწორო თამაში და არ ვიყავით დანამატი სპარინგ პარტნიორი. მეორე რაც იყო კარგი, ეს იყო იმ რეგიონში საქართველოს მთავარი სავიზიტო ბარათი. ჩვენი ბიჭები არავის არ უდებდნენ ტოლს და ეს დამარცხებულის მენატალიტეტი, რომელიც გამჯდარი იყო სპორტში, ამ სახეობებში მგონი ამჯერად გადავლახეთ", - განაცხადა პრეზიდენტმა.
მან იგორ კოკოშკოვსა და და რიჩი დიქსონს, ასევე ფედერაციების თავმჯდომარეებს დიდი მადლობა გადაუხადა.
"ჩვენ ვამაყობთ თქვენით და თქვენ მართლა ბრწყინვალედ გაართვით თავი ამ ამოცანას. და ამიტომ მე მინდა ბრწყინვალების ორდენი გადავცე რიჩი დიქსონს, იგორ კოკოშკოვს, გია ნიჟარაძესა და ბესიკ ლიპარტელიანს",- აღნიშნა მიხეილ სააკაშვილმა.
